Уралдаанч А.Чингүүн: 2014 онд найман түрүү, 16 айраг авсан

Увс аймгийн 2014 оны шилдэг уралдаанч А.Чингүүний яриаг уншигч танаа хүргэж байна. 
-Шилдэг уралдаанчид баяр хүргэе. 2014 онд ямар амжилт үзүүлсэн бэ?
-Баярлалаа. 2014 онд Тэс сумын 90 жилийн ойд Даваадорж гэдэг хүний хүрэн шүдлэнг гуравт, хар даагыг тавд давхиулсан. Манай аав морьдыг нь уядаг юм. Зүүнговь сумын 90 жилийн ойд хар даага түрүүлгэж, Улаангомд түрүүлсэн хонгор даага аман хүзүүдүүлээд хүрэн шүдлэнгээ таваар давхиулсан. Мөн Баруунтурууны баярт цавьдар азарга, шар хээр морио хоёуланг нь аман хүзүүдүүлсэн. Бас Өндөрхангай суманд очиж хар даага, хүрэн шүдлэн, хар хязаалан гурваа түрүүлгэсэн. Ингээд нийт найман түрүү, 16 айргаар оны шилдэг уралдаанчаар шалгарсан юм.
-Хэзээнээс хурдан морь унаж байгаа вэ?
-Зургаан настайгаасаа эхлээд хурдан морь унаж байгаа. 2006 онд сумдад болсон жижиг баяруудад оролцож, Шар хөдөөд зохиогдсон бүсийн наадамд хээр соёолон, хүрэн шүдлэнгээ тус тус түрүүлгэсэн. Түүний дараа 2008 онд Өндөрхангай сумын тахилга наадамд соёолон түрүүлгэсэн нь миний гаргасан анхны том амжилт. Тэнд бас хүрэн шүдлэн бас түрүүлгэсэн юм. Өөр томоохон наадмын амжилт гэвэл 2011 онд аймагт болсон даншиг наадамд цавьдар шүдлэн, шарга морь хоёроо зургаад давхиулсан.
-Улсын чанартай наадамд уралдах ямар санагдаж байв?
-Тэр эргэдэг хэсэг их хэцүү санагддаг. Дээр нь газар нь дэрс, чулуу ихтэй. 5р сард төвийн бүсийн уралдаанд гурван нас унаж арван хэдээр  давхиулсан. Наашаа Зүүнговьд болсон зүүн бүсийн уралдаанд болохоор соёолон тавд давхиулсан.
-Ерөнхийдөө моринд томдож байгаа юм байна. Дүү нар морь унах уу?
-Энэ зун унах байхаа. Манай хоёр дүү бас морь унадаг.
-Олон адуу яриад байна. Ямар, ямар хүмүүсийн морьдыг унадаг юм бэ?
-Аав, ах Мооноо, өвөө Сундуй нарын морийг унадаг. Манай аав сумын Алдарт уяач цолтой. 
-Уралдааны  замд унаач хүүхэд морийг удирддаг. Ямар тактик баримталдаг вэ?
-Морь хаана явж байна, урд явж байна уу, ард явж байна уу гэдгээс шалтгаалж уралдана. Гараанаас аль болох цээжинд гарахыг боддог.
-Хамгийн холдоо хаана явж уралдаж байсан бэ?
-Дөрөв, тавдугаар ангид байхдаа Дарханд морь унаж байсан. Манайх тийшээ шилжээд тэгээд буцаад хүрээд ирсэн юм. Дарханд хаврын бооцоот уралдаанд оролцож их нас тавлуулсан. Зам нь өгсүүр ч их гоё.
-Хэддүгээр ангид сурдаг  вэ?
-Одоо есдүгээр ангид орно. Хичээлтэй өдөр баярт явах юм бол чөлөө аваад л, дараа нь хичээлээ нөхөж авдаг. Биеийн тамир, монгол хэл, хөдөлмөрийн хичээлд илүү дуртай.
-Мэргэжлээ сонгож амжсан уу?
-Амжаагүй ээ,цаашид яахаа одоохондоо төлөвлөөгүй л байна.
-Мөрөөдөл бүхэн нь биелэх болтугай. Ярилцсанд баярлалаа. Уралдаануудад нь амжилт хүсье.

"Тод магнай" сэтгүүл Увс аймгийн тусгай дугаар