Уяач Э.Эрдэнэсайхан: Халзан азарганы үр төлүүд сум орон нутагтаа сайн давхиж байгаа

АХ-ын 94 жилийн ойн баяр наадмаас...
-Хүрэн даагаа айрагдуулсанд баяр хүргэе?
-Баярлалаа.
-Улсын чанартай наадмын анхны айраг уу?
-Хоёр дахь нь. 2012 онд Хүйн долоон худагт болсон Да лам Цэрэнчимэдийн мэндэлсэний 140 жилийн ой, төвийн бүсийн уралдаанд унаган бор даагаа айргийн таваар давхиулсан.
-Ямартаа ч улс, бүсийн  чанартай наадмаас хоёр айраг хүртээд байгаа юм байна. Хүрэн даага улсын наадмын өмнө уралдсан уу?
-Сумынхаа наадамд түрүүлчихээд улсад ирж таваар давхиад, Өвөрхангай аймагт болсон төвийн бүсийн уралдаанд 13-аар давхисан.
-Тэгээд энэ жилийн уралдаанууд отголсон уу?
-Заамар сумын сургуулийн ойд аман хүзүүдэж,  өөр хоёр ч бага наадамд уралдсан.
-Борхон гэдэг нэрийн тухайд асуумаар санагдаж байлаа. Зүс нь хүрэн шүү дээ?
-Манай аавын л өгсөн нэр. Аавыг маань Мөнхтүмэнгийн Энхбат гэдэг. Аймгийн Алдарт уяач цолтой. 1997 онд Эрдэнэтэд болсон хангайн бүсийн уралдаанд хар азаргаа айргийн дөрвөөр давхиулж байсан.
-Хүрэн дааганыхаа  удам угшлыг танилцуулаач?
-Эх нь Жаргалант гаралтай манай унаган саарал гүү. Эцэг нь Оросоос авчирсан Англи хонгор халзан азарга бий. Оросд 10 түрүүлж байсан юм гэнэ лээ. Халзан азарганы үр төлүүд сум орон нутагтаа сайн давхиж байгаа.
-Өнөө жилийн баяр наадамд хэдэн насны морь мордуулсан бэ?
-Ганц  даага л мордуулсан.
-Төвийн бүсэд айрагдсан бор дааганыхаа талаар танилцуулаач?
-Тэр жилээ улсын наадамд долоогоор давхиад, бүсэд айрагдсан. Дараа жил нь шүдлэн үрээ Орхон аймгийн наадамд түрүүлээд, Архангай аймгийн 90 жилийн ойд 14-өөр давхисан. Энэ мэтчилэн унаган адуунууд түрүүчээсээ хурдалж л байна.
-Залуу уяачийн хийморь өөдөө байж, улсын цолтой уяач болоорой.
-Баярлалаа. Ерөөл бат оршиг.
"Тод магнай" сэтгүүл №70