Ц.ГАНСҮХИЙН ХАР

Өнөө жил дуу хуурын өлгий Дундговь нутгийнхан одтой сайхан наадсаан. Төрийн наадмын соёолон хязаалан шүдлэнгийн уралдаан бүхэлдээ энэ аймгийн наадам мэт зарлагдаж байсан билээ. Монгол зургаан насанд сайн наадсан төдийгүй уяачдын баяртай зэрэгцэн болсон эрлийз насанд ч хоёр айраг авч тус аймгийхан одтой наадав. Дундговь нутгийн уяач Цэндийн Гансүхийн өсгий цагаан хар даагыг Алтанбулаг сумын залуу уяач Батмөнхийн Батхүү гарамгай хурдлуулав. Зургаан сард энэ хар даага Бараатын уулын тахилгад айрагдсан бол төрийн их баяр наадамд айргийн дөрөвт хурдалсан. Өндөр гэгээнтний их даншиг наадамд юунд ч гүйцэгдэлгүй түрүүлж, ММСУХ-ны 20 жилийн ойн даншигт айргийн дөрөвт хурдалж нэгэн зуны дотор том наадмын гурван айраг авсан ховор амжилтыг үзүүлэв. Хурдан хар даага наймдугаар сарын дундуур болсон улсын анлай уяач Гончигийн Содномын цолны мялаалга наадамд өнгөлж ирээд үзэгчид рүү ташиж, гуравт хурдалсан билээ.

"Тод магнай" сэтгүүл №70