Л.Отгонбаатар: Хүрэн үрээ маань төрийн наадмын анхны айргийг авчирлаа

АХ-ын 94 жилийн ойн баяр наадмаас...
-Төрийнхөө наадамд хурдан хүлгээ айрагдуулсан танд баяр хүргэе.
-Баярлалаа. Өмнө нь Засгийн газрын тогтоолтой бүсийн уралдаанаас айраг хүртэж байсан. Харин энэ удаа төрийнхөө наадамд хүрэн үрээгээ айрагдууллаа. Баяртай байна.
-Өмнө нь аль бүсийн наадамд ямар насны морь айрагдуулж байсан билээ?
-2013 онд болсон Архангай аймгийн 90 жилийн ой, хангайн бүсийн уралдаанд хар  морио аман хүзүүнд хурдлуулсан. Тэр хар морь маань монгол адууг дэлхийн дээд амжилтанд бүртгүүлэх 4249 морины уралдаанд 11-ээр давхиж, хангайн бүсэд түрүүлсэн шүү дээ. Түүний дараа сая хүрэн үрээ маань улсын наадам болон “Говьшанхын хурд-5” говийн бүсийн уралдаанд тус тус аман хүзүүдээд, ММСУХ-ны 20 жилийн ойн наадамд таваар давхисан.
-Өнөө жил сайхан нааджээ?
-Тэгсэн. Хүрэн үрээ маань хавар нийслэлийн тэргүүн хүлэг шалгаруулах “Хангарьд-2015” уралдаанд бас  аман хүзүүдсэн. Энэ жил дөрөв уралдаж, дөрөв айрагдчихаад байгаа юм.
-Улсын баяр наадамд хэдэн насны морь мордуулсан бэ?
-Их насанд хар морио, эрлийз дунд насанд хүрэн үрээгээ мордуулж, их морио замаас нь татуулсан. Тэгээд улсын наадмын дараа Өмнөговийн бүсэд уралдуулж, 30-н хэдээр давхиулаад, ММСУХ-ны 20 жилийн ойд уралдуулж дундуур давхиулсан.
-Өнөө жил хэдтэй морь вэ?
-11-тэй.
-Хаанахын адуу юм бэ?
-Дорнод аймгийн адуу гэнэ лээ. Би хүнээс авсан болохоор нарийн сайн мэдэхгүй байна. 2009 онд соёолондоо Ламын Гэгээний даншиг наадамд таваар давхисных нь дараа би Баянхонгор аймгийн ИТХ-ын даргаас авч байсан юм.
-Ингэхэд та төрийн наадамд хэд дэх жилдээ  морь мордуулж байна вэ?
-Хоёр дахь жилдээ  оролцож байгаа нь энэ.
-Хэдий үеэс морь уяж байгаа юм бэ?
- 2012 оноос морь уяж, байгаа харьцангуй залуу уяач аа. Гэхдээ аймгийн Алдарт уяач цолны болзлыг хангачихсан шүү.
-Уяачийн жаргал, зовлонг мэдрэхэд юу нөлөөлсөн бэ?
-Манай өвөө морь мал уядаг хүн байсан. Мөн би өөрөө багадаа хүний ганц нэг морь унадаг байлаа. Тэр бүхэн маань тодорхой хэмжээгээр нөлөөлсөн байх. Хамгийн гол нь 2012 онд манай нэг найз надад морь бэлэглээд , тэгээд л ер нь сэтгэл шулуудсан даа.
-Залуу уяачийн дараа дараагийн уралдаануудад амжилт хүсье. Ярилцсанд баярлалаа.
А.Энхжил