Уяач Д.Жамъян: Нэг түрүү, хоёр айраг хүртсэн сайхан наадлаа

АХ-94 жилийн ойн баяр наадамд эрлийз дээд ангилалд халиун азаргаа түрүүлгэсэн Говь-Алтай аймгийн Баян-Уул сумын уугуул, залуу уяач Д.Жамъяны баярын сэтгэгдлийг уншигч танаа хүргэж байна.
-Халиун азарга амжилтаа ахиулан төрий н наадмын түрүү хүлгээр тодорлоо. Баяр хүргэе.
-Баярлалаа. Халиун азарга маань улсын наадамд түрүүлээд,  давхар уяагаар Өвөрхангай аймагт болсон төвийн бүсийн наадамд аман хүзүүдсэн. Энэ жилийн хувьд хоёр уралдаад нэг түрүүлж, нэг аман хүзүүдлээ. 
-Амжилттай сайхан нааджээ. Хангайн бүсийн наадмыг зорьсон сурагтай байсан. Тэнд хэдэн насны морь мордуулж, ямар амжилттай наадсан бэ?
-Булган аймагт болсон хангайн бүсийн уралдаанд соёолон аман хүзүүдэж, их насны морь 11-ээр давхисан. Энэ жил миний хувьд  азарга, их нас, соёолон, шүдлэн уяж, нэг түрүү, хоёр аман хүзүү хүртэн амжилттай сайхан наадлаа.
-Шүдлэн үрээ тань хэдээр давхисан бэ?
-Шүдлэн үрээ хасагдчихсан. Их олон шүдлэн хасагдсан шүү дээ. Тэрэн дунд миний үрээ орчихсон байсан. Миний хувьд сүүлийн хоёр жил өөрийнхөө нэртэй морьдыг төрийн наадамд мордуулж байгаа. Түүнээс өмнө ах нарынхаа уясан морьдыг харах гэж ирдэг байсан.  Шүдлэнгийн уралдаантай холбогдуулаад өөрийнхөө бодлыг хуваалцахад ялгах нэрийн дор олон хүний хөдөлмөрийг үнэгүйдүүлж болохгүй байх. Холоос зорьж ирээд монгол үрээгээ хасуучихлаа гэсэн уяачид олон байна лээ. Тиймээс цааш цаашдаа энэ байдал дээрээ дүгнэлт хийх байлгүй дээ.
-Халиун азарга сунгаануудад хэр байсан бэ?
-Сунгаан дээр ер нь өнгөнд уралдаж байсан. Тийм болохоор айрагдчих байх гэж бодож байсан.
-Ах дүү гурав урамтай сайхан уралдан, нэг жилийн төрийн их баяр цэнгэл наадмаас айраг , түрүү хүртэцгээлээ. Бас нэгэн шинэ амжилт байх шүү?
-Тиймээ, өнөө жил манайхан сайхан наадацгаасан. Ганбаа ахын маань соёолон түрүүлж, их морь айрагдаад, Шинжээ /Цэрэнжигмэд/ ахын халтар морь дөрвөөр давхиж, миний халиун азарга түрүүлсэн. Улсын наадмын дараа Шинжээ ахын халтар морь Булганы бүсэд, Ганбаа ахын  шарга морь Өвөрхангайн бүсэд айрагдаж, миний халиун азарга, соёолон хоёр айрагдсан.
-Амжилтын буухиа үргэлжлэх болтугай. Бидний урилгыг хүлээн авч ярилцсанд баярлалаа.
"Тод магнай" сэтгүүл №70