Лувсангийн Гэлэгдаржаа

Уяачийн эрдмээрээ гайхагдаж Угтаал нутгаас төрсөн хуучин цагийн сайхан уяачдын тоонд Лувсангийн Гэлэгдаржаа орно. Тэрбээр хар багаасаа тал маллаж өссөн хүн. 1953 оноос морь хар уяж эхэлсэн байна. Тэртээ 1957 онд түүний уясан хул шүдлэн үрээ нь айрагдаж, морь уях урам зориг нэмэгдсэн байна. Улмаар адууныхаа угшлыг сайжруулах нь зөв гэдгииг ойлгож Дэрэн сумын ахмад уяач Товуугаас хул азарга, Төв аймгийн Баянцагааны Банзараас буурал морь, Говь-Угтаалын О.Шаравжамцаас хонгор азарга, ахмад уяач "Ханан" хэмээх Дондовоос хүрэн азарга, хар гүү зэргийг тус тус худалдан авч байжээ.
 Тэрбээр Төв,  Дундговь,  Говьсүмбэр аймгуудын болон тэдгээр аймгуудын сумдын наадамд морьдоо хурдлуулж, нийт 18 түрүү, 51 айраг авсан байна. Түүний энэ амжилтыг үнэлж, 2001 онд аймгийн "Алдарт уяач" хэмээх эрхэм цолыг олгосон ажээ. Түүний Банзарын буурал саарал морь, жижиг хул, их хонгор, чөтгөр хонгор, хамар цагаан зээрд азарга, хээр морь зэрэг нь аймаг, сум, бүсийн уралдаануудад олон удаа айрагдаж, түрүүлж байжээ. Морио амархан таньж, уяаг нь тааруулж сойж чаддаг энэ эрдэм төгс уяач өөрийн эрдмээ залуу үеийнхэндээ харамгүй зааж сургаж, өвлүүлж үлдээсэн гэдэг. Түүний шавь нараас өдгөө Б.Сүрэндаваа, Ш.Баярням, Ө.Нэргүй нар өнөөг хүртэл морьдоо хурдлуулж, олон түмнээ баясгасаар байна.
Л.Цэрэнжаргал, "Тод магнай" сэтгүүл Дундговь аймгийн тусгай дугаар