Зуун дамжин хурдалсан цуут хүлгэдийн эзэн Ч.Гүүш

Отрын бор гэрт голомтоо бадраасан ММСУХ, дөрвөн зүг, найман зовхисыг байлдан дагуулж, хөх Монголын моринд хорхойтой эрсийн цөсийг хөөргөн байхуй тэр л цаг дор аймаг, сумын наадмын 48 түрүү, 104  айргийнхаа хөдөлмөрийг үнэлүүлж, МУ-ын Алдарт уяач хэмээх эрхэм цолоор энгэрээ мялаасан буурал бол Өмнөговь аймгийн Цогт-Овоо сумын уугуул Ч.Гүүш юм.
         Ч.Гүүш Алдарт 1950 оноос хусуур сойз бүслэнхэн хурдан хүлгийн уяа юуг тааруулж, хөхөл сүүлийг нь шууж эхэлсэн түүхтэй. Дээл хөөртөл дэргэх хурдан хүлгэд нь Цогт-Овоогийн хүүгийн урмыг хугалж байсан удаагүй. Хаана ч очсон нүүр бардам, дархан айраг амсана. Зарим жил энэ хавьдаа надаас өөр наадах хүнгүй билүү гэтлээ аархаж явсан гэдэг. Алдарт аархахаас ч аргагүй байлаа. Учир нь түүний нэртэй хүлгэд зуун дамжин хурдалж,  шинэ үеийн төлөөлөлтэй ана мана үзэлцэж байв.
         Улсын Алдартын тэмдгээр энгэрээ мялаасан гахай жилээс хойш гэхэд л тэрээр олон айраг түрүүний эзэн болж, залуу хойчдоо үлгэрлэж байсан билээ.
         1996 оны аймгийн баяр наадамд Оргойн хурдан хүрэн азарганы угшилтай хонгор хязаалан, зээрд даага нь тус тус түрүүлж, тэр жил болсон Таван толгой уурхайн 30 жилийн наадамд хонгор хязаалан нь мөн л алтан жолоо өргүүлж алдар цолоо дуудуулсан бол 1997 оны аймгийн баяр наадамд хонгор шүдлэн нь түрүүлж, харин 1998 онд хүрэн шүдлэн нь Цогт-Овоо сумын наадамд айргийн дөрвөөр, зээрд хязаалан нь айргийн таваар тус тус  хурдалжээ.
         Түүний дараа жил буюу 1999 онд зээрд соёолон сумынхаа наадамд айргийн дөрвөөр хурдалж, уясан эзэн унасан хүүхэд, наадамчин олноо цэнгүүлж байсан юм.
"Тод магнай" сэтгүүл Өмнөговь аймгийн тусгай дугаар