Аймгийн Алдарт уяач Ж.Найданжав

Нэгдүгээр багийн харьяат Ж.Найданжав нь 1931 онд Архангай аймгийн Цэцэрлэг сумын Чулуут багийн Балчин хэмээх газар малчин ард Жасрайн ууган хүү болон мэндэлжээ. Бага насаа эцэг эхийн гар дээр өнгөрүүлж гэрээр ном заалган бичиг үсэг тайлагдсан тэрээр цэргийн алба хааж ирээд 1972 он хүртэл Чулуут багт мал маллаж байв. Дараа нь Хөвсгөл аймгийн Рашаант суманд шилжин ирж, “Улаан-Од” нэгдэлд 1991 он хүртэл мал маллаж байгаад өндөр насны тэтгэвэрт гарсан юм.
Аймгийн Аварга уяач Ж.Найданжав нь морь уях, шинжих эрдмийг сайтар эзэмшсэн уяач байлаа. Залуу насандаа нэгдлийн адуу маллаж эмнэг сургах, морь уях эрдэмд суралцаж баг, сумынхаа наадмаас түрүү, айраг олныг авч 1998 онд аймгийн аварга уяач болсон юм. Ж.Найданжав нь нутаг ус, цаашлаад эргэн тойрны сумандаа алдаршсан хоёр сайхан хээр морьтой хүн байлаа. Хөвсгөл аймгийн Рашаант сумын баяр наадамд түүний уяж хурдлуулсан бага хээр морь долоон настайдаа анх түрүүлсэн бол түүнээс хойш тасралтгүй айраг түрүү хүртэж байсны дотор 1995 онд Баян-Агт сумын 70 жилийн ойн баяр наадамд 250 гаруй шандаст хурдан хүлгүүдээс айргийн дөрөвт хурдлан ирж наадамчин олноо баярлуулж нутаг усныхаа нэрийг гаргаж байсан юм.
"Тод магнай" сэтгүүл №45