Монгол Улсын Алдарт уяач Тогтохын Цэвээн

Монгол адууны тэсвэр хатуужил, холч чанарын илэрхийлэл болсон Тэс омгийн хурдан хүлгүүдийн голомт Тэс сумаас төрсөн улсын Алдарт уяачдын нэг нь Тогтохын Цэвээн агсан юм. Тэрээр 1956 онд Тэс  сумын 11-р багийн нутагт мэндэлсэн агаад бага наснаасаа хурдан морь унаж хурдлуулан, нутгийн буурлуудаас магтаалын үг дуулж явжээ. Моринд томдон хасагдах үеэс морь уясан Т.Цэвээн их хонгор морио сумын баяр наадамд айрагдуулан амжилтын гараагаа эхэлж, халиун морио овоо тахилга болон бусад бэсрэг наадмуудад олонтоо түрүүлгэж айрагдуулсан гэдэг. Гэсэн хэдий ч төрийн хишигт уяач болоход түүний хурдан хонгор морь нь үнэмлэхүй хувь оруулсан билээ.
Хурдан хонгор морь нь:
- 1999 онд соёолондоо Ховд аймагт болсон баруун бүсийн уралдаанд түрүү
- 2005 онд Увс аймагт болсон баруун бүсийн уралдаанд айргийн гурав
- 2006 онд Говь-Алтай аймагт болсон баруун бүсийн уралдаанд айргийн дөрөв
- 2007 онд Хөвсгөл аймагт болсон “Хотгойдын хурд” баруун бүсийн наадамд айргийн тавд тус тус хурдалж байсан агаад, Засгийн газрын тогтоолт наадмаас нэг түрүү,  гурван айраг хүртсэн хурдан хүлэг юм.
Хурдан хонгорыг 2007 онд  аймгийн Алдарт уяач Ц.Ядамцоо уяж, Хөвсгөлийн даншигт айрагдуулаад буцахдаа Зүүнговь сумын сургуулийн ой болон Тэс сумын харьяат Улсын начин Улаан гуталт хэмээх М.Цэрэндоржийн мялаалга наадмуудад тус тус түрүүлгэжээ. Ийнхүү Тэс адууны чансааг таниулсан хонгор морь долоо хоногийн дотор хоёр түрүүлж, нэг айрагдан, гурван мотоцикль авч байсан гэдэг.
Түүнчлэн 2008 онд Ховд аймагт болсон “Алтайн унага-2008” баруун бүсийн наадамд зургаад хурдалж, Хан хөхий хайрханы төрийн тахилгад  гурваар давхиж байсан нэгэн цагийн цуут хүлэг билээ.
"Тод магнай" сэтгүүл Увс аймгийн тусгай дугаар