Монгол улсын Алдарт уяач Доосүрэнгийн Гомбосүрэн

Хагас зуун жил хурдан хүлгийн уяа тааруулж аймаг, сумын наадмаас таван түрүү, 52 айраг хүртсэн МУ-ын Алдарт уяач Д.Гомбосүрэн 1931 онд одоогийн Түнэл сумын 3-р багийн нутаг Цагаан булан хэмээх газар малчин ард Доосүрэнгийн ууган хүү болон мэндэлжээ. 25 наснаас уяачийн гараагаа эхэлж /1956 оноос/ өөрийн унаган хүрэн азаргыг уяж байсан бол анхны айргаа түүний төл  хүрэн морийг аймгийнхаа  баяр наадамд шөвгөрүүлэн амсаж байсан  хэмээдэг.
Д.Гомбосүрэн Түнэл сумын харьяат, аймгийн Алдарт уяач Батбаяраас хээр азарга худалдан авч, хоёр жил дараалуулан аймгийн наадамд айрагдуулж байсан чадварлаг уяач.
1972 , 1973 онуудад айргийн гуравт хурдалж байсан хээр азарга нас ахимаг гэсэн шалтгаанаар зодог тайлсан ч  үр төлүүд нь эцгийн шийрийг хатаан хурдалж, Д.Гомбосүрэн уяачийн магнайг тэнийлгэж байсан билээ.
Хээр азарганы төл цавьдар морь даагандаа /1979 онд/  Түнэл сумынхаа наадамд түрүүлээд, аймгийн наадамд амжилтаа бататгаж магнайлсан бол 1980 онд шүдлэндээ  сумынхаа наадамд түрүүлээд, аймгийн наадамд аман хүзүүдсэн байна. Харин 1981 онд хязааландаа АХ-ын 60 жилийн ойгоор  аймгийн наадамд түрүүлж, түүнээс хойш сумандаа  хэд хэд айрагджээ. Хээр азарганы өөр нэг төл хүрэн азарга:
1985 онд АХ-ын 64  жилийн ойгоор аймгийн наадамд-айргийн дөрөв
1986 онд АХ-ын 65 жилийн ойгоор аймгийн наадамд-айргийн гурав
1987 онд АХ-ын 66 жилийн ойгоор аймгийн наадамд-айргийн дөрөвт давхиад 
1988, 1989 онуудад сумынхаа наадамд айрагт хурдалжээ.
Хээрийн төлөөс  эцгийн шийрийг хатаасан өөр нэгэн буян тодорсон нь 1985 онд аймгийн наадамд түрүүлсэн шар халтар соёолон юм./ хүрэн азарганы дүү/ Халтар морь нас нийлсэн хойноо 1990 онд аймгийн наадамд гурваар давхиж байсан удаатай.
Д.Гомбосүрэн Алдартын нэрийг гаргасан хурдан хүлгэдийн дараагийнх нь хязааландаа /1985 онд/ аймгийнхаа баяр наадамд түрүүлж, соёолондоо /1986 онд/ гурвалж байсан хар морь нь. Мөн 1988 онд аймгийн наадамд гурваар давхисан шар хээр азарга нь. Энэхүү хээр азарга аймгийн Алдарт уяач Наянжингийн хурдан хээр азарганы төл юм. 1990 онд Д.Гомбосүрэн уяачийн хүрэн зүсмийн хоёр шүдлэн аймгийн наадамд гурав дөрвөөр давхиж байсан бол 1999 онд хонгор азарга нь аман хүзүүдэж, хүрэн даага нь айргийн таваар давхиж байжээ. Харин хамгийн одтой хийморьтой наадсан он жилүүдийн нэг нь  хоёр түрүү, хоёр айраг хүртсэн 1985 он буюу АХ-ын 64 жилийн ой юм.
 2006 оныг хурдан хүлгээ уяж сойж асан Д.Гомбосүрэнд 2003 онд Монгол улсын Алдарт уяач цолыг олгосон бөгөөд өдгөө хөвгүүд нь хусуур, сойз, хуйв уургыг нь өвлөн авч унаган хүлгэдээ уяж сойж байна. Аавынхаа тухай дурсамжийг хуваалцсан хүү Лхагвасүрэн нь л гэхэд хээр алаг азаргаа аймагт хоёр айрагдуулж, сумын наадамд нэг түрүүлгээд байгаа аж.

"Тод магнай" сэтгүүл Хөвсгөл аймгийн тусгай дугаар