Уралдаанч Г.Сүхбат: Бариа ойртож үзэгчид уухайлах тэр агшин хамгийн гоё

Их Монгол Улс байгуулагдсаны 809  жил, Ардын хувьсгалын 94 жилийн ойн үндэсний их баяр наадамд 161 хурдан даага тоосоо өргөж, Говь-Алтай аймгийн Шарга сумын уугуул, Тод манлай уяач Х.Бат-Эрдэнийн хээр магнайдаа тоосгүй түрүүлсэн билээ. Хээр даагыг 2012, 2013, 2014 оны шилдэг уралдаанч Гансүхийн Сүхбат хүү унаж хурдлуулсан юм. Шилдэг уралдаанч баярын сэтгэгдлээ ийн хуваалцлаа.
-Даага түрүүлгэсэн шилдэг уралдаанчид баяр хүргэе. 
-Баярлалаа. Улсын баяр наадамд дахин даага түрүүлгэсэндээ баяртай байна. Би улсын баяр наадамд тав дахь жилдээ хурдан морь унаж байгаа. Өмнөх жилүүдэд их морио айргийн гуравт, соёолон аман хүзүү, азарга аман хүзүү, хязаалан айргийн дөрөвт, шүдлэн айргийн тав, даага дөрвөөр оруулж байсан.  Мөн их морь, даага  тус бүр хоёр хоёр түрүүлгээд байна.
-Олон жил унасан хүлгээ айраг түрүүнд хурдлуулсан унаачид хамгийн гоё нь хаанахын наадам байв? 
-Тэр энэ наадам гэхээсээ илүү бороо ороогүй, нартай сэрүүхэн өдөр уралдах гоё. Ер нь улсын наадам хамгийн гоё болдог. Хол уралддаг болохоор морины бие халаад сайхан давхидаг юм. Тэр тусмаа айраг түрүүнд хурдлан бариа ойртож үзэгчид уухайлах тэр агшин хамгийн гоё. Тиймдээ ч би баяруудаас улсын наадамд их дуртай. 
-Олон удаа шилдэг унаач болсон туршлагатай уралдаанч байх аа?
-Тийм. Би олон айраг түрүү хүртэн 2012, 2013, 2014 оны шилдэг унаачаар шалгарч байсан. Удахгүй дэд мастер болно.
-Аль сургуулийн хэд дүгээр ангид сурдаг билээ?
-Би 59 дүгээр сургуулийн 4г ангид сурдаг. Энэ жил 12 настай, таван настай байхаасаа л морь унасан.
-Морь унахаас гадна юу сонирхдог бэ?
-Би морь унах л дуртай. Морио унаад уралдах чинь хамгийн гоё ш дээ.
-Ярилцсанд баярлалаа. Цаашдынх нь уралдаанд амжилт хүсье.

А.Энхжил