Уралдаанч П.Тэмүүжин: Олон айраг, түрүүтэй гэхдээ тоолж байгаагүй

Төрийн наадамд газар газрын шигшмэл хурд тоосоо өргөн, аз од нь гийсэн тавхан хүний хүлэг асрын өмнө алдар цолоо дуудуулан цоллуулдаг билээ. Энэ таван азтаны нэг болж унасан хоёр ч үрээгээ айрагдуулсан авхаалжтай уралдаанч бол Пүрэвсүрэнгийн Тэмүүжин юм.  Тэрээр бидний асуултанд ийн хариуллаа. 
- Төрийн наадмаас хоёр айраг хүртсэн уралдаанчийн баярын сэтгэгдлээс яриагаа эхэлье. 
- Намайг Пүрэвсүрэнгийн Тэмүүжин гэдэг. 12 настай. Энэ жилийн төрийн баяр наадамд хоёр үрээгээ айрагдууллаа. Зээрд шүдлэн аман хүзүүнд, хонгор даагаа айргийн тавд хурдлуулсандаа сэтгэл өндөр, баяртай байна.
- Хэдэн настайгаасаа эхлэн хурдан морь унасан бэ?
- Найман настайгаасаа эхлэн хурдан морь унаж байгаа.
- Төрийнхөө баяр наадамд хэд дэх жилдээ морь унаж байгаа вэ?
- Хоёр дахь жилдээ морь унаж байна. Халзан үрээг дааганд нь зургаад давхиулж байсан.
- Анхны айргаа хэдэн оны ямар наадмаас авч байв? Одоо хичнээн айраг түрүүтэй болоод байгаа вэ?
- Мэдэхгүй, олон л болсон байхаа.Тоолж байгаагүй юм байна.
- Аль, аль аймагт очиж уралдаж байсан бэ?
- Бараг бүх аймагт очиж уралдсан. Гэхдээ хамгийн гоё нь улсын баяр наадам байдаг.
- Аль сургуулийн хэддүгээр ангид сурдаг вэ?
- Манайх Сэлэнгэ аймгийн Алтанбулаг суманд байдаг. Би тавдугаар ангид сурдаг. 
- Баярлалаа. Цаашдынх нь уралдаанд амжилт хүсье.

А.Энхжил