Уралдаанч С.Батхүү: Морио унаад олон газрын наадамд явах сайхан шүү дээ

Их Монгол улс байгуулагдсаны 809, Ардын Хувьсгалын 94 жилийн ойн төрийн их баяр цэнгэлд газар газрын 209 хурдан хязаалан тоосоо өргөж, айргийн тавд хурдалсан хонгор халзан үрээг Сүхбаатар Алдартын хүү 10 настай Батхүү унасан юм.Тэрээр хонгор халзан үрээгээ хоёр дахиа төрийн наадамд айрагдуулж байгаа бөгөөд бидний асуултанд ийн хариулсан юм.
- Хонгор халзан үрээгээ хоёр дахь удаагаа төрийн баяр наадамд айрагдууллаа. Баяр хүргэе.
-Баярлалаа. Хонгор халзан үрээгээ өнгөрсөн жилийн баяр наадамд айргийн дөрөвт, энэ жил айргийн тавд хурдлууллаа.Төрийн наадамд үрээгээ дахин айрагдуулсандаа баяртай байна.
- Аав нь өнөөдөр мордоход нь юу гэж захисан бэ?
- Салхиныхаа дээд талд яваарай шороонд булагдчихна гэсэн.
- Өнгөрсөн жил улсын наадамд морио айрагдуулж байсан болохоор энэ жил багагүй туршлагажсан байх.
-Ноднин улсын наадамд анх удаа морь унахдаа айж байсан. Энэ жил харин туршлагатай, хаанаас морио хэрхэн давхиулахаа мэддэг болсон байна. 
- Анхны амжилт хаанахын наадамд хүртсэн бэ?
- Би зургаан настайгаасаа хурдан морь унасан. Салхит овооны наадамд халзан үрээгээ дааганд нь түрүүлгэн анх хишиг хүртсэн.  Одоо нийт зургаа, долоон айраг түрүү аваад байна.
- Морь унах гоё уу?
- Морио унаад давхих, бас энд тэндэхийн наадамд явах гоё ш дээ. Олон газар очиж уралдана.
- Аав хүү хоёр энэ жил төрийн баяр наадамдаа хэдэн морьтой ирсэн бэ?
- Хязаалан шүдлэн хоёртой ирсэн.
- Миний дүү аль сургуульд сурдаг бэ?
-Дундговь аймгийн гуравдугаар сургуулийн дөрөвдүгээр ангид сурдаг.
- Өмнө нь ямар ямар амжилт гаргаж байсан бэ?
-Аймагт гурав түрүүлсэн. Энэ жил халзан үрээтэйгээ улсын наадмаас гадна Өндөршилд арван хэдээр давхиад мөн овооны наадамд түрүүлсэн. Өнгөрсөн жил халзан үрээтэйгээ зургаа, долоо уралдсан. Улсын баярт дөрөв, Хулд суманд түрүү, Дэлгэрхангайд аман хүзүү, аймгийн баяр наадамд аман хүзүүдсэн.
- Ярилцсанд баярлалаа. Унасан хүлгээ дандаа айраг, түрүүнд хурдлуулж байгаарай.

А.Энхжил