Аймгийн Алдарт уяач Д.Сүхбаатар: Цаашдаа ялгалтан дээрээ анхаарахгүй бол холоос ирсэн бидэнд гомдолтой л байна

АХ-94 жилийн төрийн их баяр наадамд  хонгор хязаалангаа айргийн тавд хурдлуулсан Дундговь аймгийн Адаацаг сумын уугуул, аймгийн Алдарт уяач Д. Сүхбаатарын баярын сэтгэгдлийг уншигч танаа хүргэж байна.
-АХ-ын 94 жилийн ойн баяр наадамд таны хонгор халзан үрээ айргийн тавд хурдалсан. Уншигчдынхаа өмнөөс баяр хүргэе?
-Баярлалаа. Өнөө жил шүдлэн, хязаалан  насны морьдтой очиж, хонгор халзан үрээгээ айргийн таваар давхиуллаа.
-Хязаалан айрагдаж, шүдлэн хэдээр давхисан бэ?
-Шүдлэнгээ хасуулчихсан.
-Нөгөө олон үрээн дунд байжээ дээ. Сэрвээний өндрөөр тэнцээгүй юм уу?
-Би учрыг нь ойлгохгүй байгаа юм. Цэвэр монгол адуу шүү дээ. Тийм өндөр биш. Уг нь шинэ цаийн адуугаа л ялгана гэж яриад байсан. Тэгсэн хэр нь цэвэр монгол адуу хасчих юм. Хүмүүсийн ярих нь үүлдэрлэг байдлаа ялгаж чадахгүй туршлага муутай залуус комисст нь байсан гэх юм билээ.
-Шүдлэнгээ хасуулсан хүмүүсийн зарим нь наадмын өмнөх сунгаануудад сайн байсан үрээнүүд албаар авч үлдлээ гэлцэж байсан. Таны үрээ сунгаануудад хэр байсан бэ?
-100-гаад шүдлэн уралдсан овооны  тахилга наадамд түрүүлчихээд улсад очсон. Үнэн зөв ялгахгүй бол уяачийн бүтэн жилийн хөдөлмөр талаар болж байгаа юм шүү дээ. Цаашдаа энэ ялгалтан дээрээ анхаарахгүй бол холоос ирсэн бидэнд гомдолтой л байна.
-Холбогдох байгууллагууд нь анхааралдаа авах байхаа. Алдарт хонин жил гарсаар яаж наадав?
-Энэ жил сайн наадсаан. Хавар Өндөршил суманд болсон аймгийн зүүн бүсийн уралдаанд шүдлэн үрээ айргийн гуравт давхиулсан. Улсад хязаалангаа айрагдууллаа. Улсаас ирээд Өмнөговийн бүсэд очиж халзан үрээгээ түрүүлгэлээ.  Энэ бол томоохон наадмын амжилт. Бага сага овоо тахилгын наадамд бол олон адуу айрагдуулсаан.
-Хаанахын наадам хамгийн сайхан болов?
-Мэдээж жилдээ ганц төрийн наадам сайхан шүү дээ. Мөн Говьшанхын хурд их сайхан болсон. Ер нь тэгээд наадам болгон сайхан даа.
-Сүүлийн жилүүдэд унаган хүлгүүдээ улс, бүсийн наадмуудад тогтмол айрагдуулж буй. Адуу авах хүсэлт ирж байгаа биз?
-Өмнө нь нэг их наймаа арилжаа хийж байгаагүй ээ. Харин энэ жилээс ганц нэг гүү авах санал ирээд байгаа.
-Баярын сэтгэгдлээ хуваалцсан танд баярлалаа. Хурдан тууртын босоо цагаан хийморьт үе удмаараа, өнө мөнх ивээгдэж явах болтугай. Амжилт хүсье.
-Баярлалаа. Та бүхний ажилд бас амжилт хүсье.

А.Энхжил