Уралдаанч Г.Алтантөгс: Санасандаа хүртэл уралдан морио айрагдуулж чадлаа

Төрийн их баяр цэнгэл наадамд Өмнөговь аймгийн Даланзадгад сумын уугуул, аймгийн Алдарт уяач Б.Бадраагийн хонгор хязааланг 13 настай Ганчимэгийн Алтантөгс хүү унан, айргийн дөрөвт хурдлуулсан. Тэрээр  мөн эрлийз дунд насанд зээрд үрээгээ аман хүзүүнд хурдлуулсан авхаалжтай нэгэн юм. 
-Унасан хүлгүүдээ  айрагдуулсан авхаалжтай хүүд баяр хүргэе.
-Баярлалаа.Хонгор хязаалангаа айргийн дөрөвт, зээрд үрээгээ аман хүзүүнд хурдлуулж энэ жил төрийн наадамдаа одтой сайхан наадсандаа их баяртай байна. 
-Улсын наадамд хэд дэх жилдээ уралдаж байна?
-Би хурдан морь унаад долоон жил болж байна. Улсын баяр наадамд гурав дахь жилдээ морь унасан. 2013, 2014 онуудад нэг нэг айраг авч байсан.  
-Туршлагатай уралдаанч морио айрагдана гэдэгт итгэлтэй байсан уу?
-Олон газрын хурдан хүлгүүд ирсэн болохоор айрагдана гэдэгт нь нэг их итгэлтэй байгаагүй ээ. Тархинд эхний хэдэн морьтой гарвал морио сайн амраагаад яваарай гэж уяач маань гарахад захисан юм. Тэр дагуу нь  замдаа морио амраагаад л явсан. Тэгээд санасандаа хүртэл уралдан морио айрагдуулж чадлаа. Гоё байна.
/инээв/ 
-Засгийн газрын тогтоолт бүсийн наадмуудад оролцож байв уу?
-Архангай аймагт болсон “Тамирын хурд” уралдаанд морио айрагдуулж байсан. Мөн энэ жил Дүнжингаравын хурдад соёолон түрүүлгэсэн.
-Энэ жил олон уралдав уу?
-Он гарсаар найм дахь уралдаан нь улсын наадам байлаа. Үүний дараа говийн бүсийн уралдаанд явна. 
-Ярилцсанд баярлалаа. Дараа дараагийнх нь уралдаануудад амжилт хүсье.

А.Энхжил