А.Мөнхбаярын хурдан хээр

Дундговь аймгийн Сайнцагаан сумын уугуул Адъяагийн Мөнхбаярын хээр соёолон АХ-ын 94 жилийн ой, үндэсний их баяр наадамдаа наймд хурдаллаа. 1997 онд болсон Зава Дамдины түмэн мэлмий гийсний 130 жилийн ойд хээр даагаа айргийн дөрөвт хурдлуулан томоохон наадмын өм нээсэн тэрээр 2014 оны “Их мандал-2014” төвийн бүсийн уралдаанд соёолон түрүүлгэн, шүдлэн айрагдуулж, өнөө жил “Дүнжингаравын хурд-2015” уралдаанд Дэмбээ загал соёолонгоо айргийн дөрөвт хурдлуулан, улс, бүсийн наадмаас нэг түрүү, гурван айраг хүртээд буй юм. 
А.Мөнхбаяр 2011 оноос төрийн наадамд морь мордуулж, анхны жилээ л даага 32-оор давхиулж, хоёр дахь жилээ зээрд хязаалангаа өнгөнд уралдуулж байсан билээ. 14 нас хүртлээ Дундговь аймгийн Говь-Угтаал сумын харьяат, аймгийн Алдарт уяач Баатарын морийг унаж байсан А.Мөнхбаяр хурдан хээрийнх нь уяа сойлгыг тааруулдаг  Адаацаг сумын уугуул, аймгийн Алдарт уяач Дашдэлэгийн Даваацэрэн найздаа болон уралдаанч Дэжидбалын Чанцалмаа охиндоо баярлаж талархаж буйгаа манай сэтгүүлээр дамжуулан илэрхийлснийг уламжлахдаа таатай байна. Ингээд хурдан хээрийн удам, угшил, амжилтын товчооныг товч танилцуулъя.
УДАМ, УГШИЛ
Сүхбаатар аймгийн Уулбаян сумын уугуул, Борын Дондогийн Дагвадорж гэж хүний унаган адуу.
Эцэг: Уулбаян сумынхаа наадамд түрүүлж, айрагдсан хурдан хүрэн азарга
Эх: Дагвадоржийн унаган гүү.
АМЖИЛТЫН ТОВЧООН:
2014 онд хязаалан:
Дундговь аймгийн хаврын бүсийн уралдаанд зургаа
Дундговь аймгийн хаврын бооцоот уралдаанд түрүү
АХ-ын 93 жилийн ой, үндэсний их баяр наадамд 20 гаргаж давхисан
2015 онд соёолон:
“Дүнжингаравын хурд-2015” хаврын бүсийн уралдаанд 23
Дундговь аймгийн Адаацаг сумын наадамд аман хүзүү
Дундговь аймгийн зүүн бүсийн уралдаанд аман хүзүү
АХ-ын 94 жилийн ой, үндэсний их баяр наадамд найм

"Тод магнай" сэтгүүл №68