Уралдаанч О.Зулбаяр: Сүүлийн гурван жил шилдэг уралдаанчаар шалгарч байна

АХ-ын 92 жилийн ойд хонгор соёолонгоо түрүүлгэж, төрийн наадмын түрүү хүртэж байсан Отгоннасангийн Зулбаяр өнөө жилийн хээр соёолонгоо айргийн гуравт хурдлууллаа. Засгийн газрын тогтоолт бүсийн наадмаас таван айраг хүртэж, сүүлийн гурван жил дараалан аймгийнхаа шилдэг уралдаанчаар шалгарч байгаа гэнэ лээ.
-Унаган соёолонгоо урамтай сайхан айрагдууллаа. Баяр хүргэе?
-Баярлалаа. Соёолонгоо айрагдуулсандаа баярт байна. Би хээр үрээгээ шүдлэнгээс нь хойш унаж байгаа. 
-Зулбаярын хувьд улс, бүсийн наадмаас цөөнгүй хишиг хүртэж байгаа байх?
-Том жижиг олон наадмуудад оролцож байлаа. 2012 онд Баян-Өлгий аймагт болсон баруун бүсийн даншиг наадамд хонгор шүдлэнтэйгээ очиж түрүү магнайд хурдлуулсан. Мөн хүрэн морио дөрөвлүүлж, хул үрээгээ аман хүзүүдүүлж байлаа. Өндөр гэгээн Занабазарын Бат-Оршил өргөх наадамд хүрэн морио гурваар оруулсан.2013 оны улсын наадамд соёолон түрүүлгэн сүүлийн гурван жил дараалан Өвөрхангай аймгийнхаа шилдэг уралдаанчаар шалгараад байгаа.
-Олон газар уралдсан байна. Хамгийн их сэтгэлд үлдсэн нь хаанахын наадам байсан бэ?
-2009 онд Хайрхандулаан сумын сургуулийн 70 жилийн ойгоос анхны айргаа хүртсэн. Анхны амжилт гэдэг утгаараа тэр л их гоё санагддаг даа. Мөн 2013 онд улсад соёолон түрүүлгэхдээ их баярласан.
-Морь унаад хичнээн жил болж байна вэ? 
-Морь унахыг анх ааваараа заалгаж байлаа. Түүнээс хойш хурдан морь унаад зургаан жил болж байна. Миний аав Монгол улсын Манлай уяач Б.Отгоннасан.
-Ярилцсанд баярлалаа.

А.Энхжил