Уралдаанч Ү.Бум-Аюур: Би чинь морио унаад хийморио сэргээж яваа хүн шүү дээ

Дэлхийд ганцхан Монгол наадмаараа дэнж хотойтол нааддаг түмний цэнгэл баяр наадам Хүй мандалын ногоон дэнжид өргөн дэлгэр сайхан болж өнгөрсөн. Энэ жилийн соёолонгийн уралдаанд газар газрын 196 хурдан туурт мордсоноос 14 настай Үүрийнтуяагийн Бум-Аюур хүүгийн унасан зээрд соёолон аман хүзүүнд хурдалж наадамчин олноо баясгасан билээ. Бяцхан уралдаанчийн баярын сэтгэгдлийг хуваалцлаа.
-Тоосонд нь ороход бүтэн жилийн хийморь сэргээдэг соёолон насны уралдаанд зээрд үрээгээ аман хүзүүнд хурдлууллаа. Баяр хүргэе?
-Баярлалаа. Уг нь түрүүлэхийг их хичээсэн боловч аман хүзүүдлээ. Тэгсэн ч гэсэн гоё байна.
-Хэд дэх жилдээ хурдан морь унаж байгаа вэ?
-Дөрвөн настайгаасаа эхлэн хурдан морь унаж байна. Улсын наадамд дөрөв дэх жилдээ хурдан морь уналаа.
-Өмнөх жилүүдэд ямар амжилт үзүүлж байсан бэ?
-Өмнө нь Ганаа ахын хонгор халзанг  даага, шүдлэнд нь аман хүзүүдүүлж байсан. Халзан үрээ хязааландаа наймаар давхисан.
-Соёолонгоо айрагдуулна гэдэгт хэр итгэлтэй байсан бэ?
-Итгэлтэй байсан. Угаасаа хурдан байсан юм.
-Засгийн газрын тогтоолт бүсийн уралдаануудад оролцож байсан уу?
-“Их мандал”-д хоёр жил дараалан түрүүлсэн. 2014 оны Дүнжингаравын хурдаас бас айраг авсан.
-Хамгийн гоё нь хаанахын наадам байсан бэ?
-Энэ жилийн улсын баяр наадам. Би чинь морио унаад хийморио сэргээж яваа шүү дээ, сайхан санагдсан.
-Ярилцсанд баярлалаа.

А.Энхжил