Уралдаанч Х.Содномдорж: Уг нь түрүүлье гэж бодсон ч амыг нь татаж яваад айрагдуулчихлаа

Аз нь гийсэн аавын хүүгийн хүлэг төрийн их баяр наадамд  түрүүлж, айрагдан түмэн олноо баясгадаг жамтай. Хурдан хүлгээ айраг, түрүүнд хурдлуулах уяач, уралдаанчийн туйлын хүсэл.  АХ-94 жилийн ойд саарал морио айргийн тавд, эрлийз дээд насны ангилалд хурдан хонгороо айргийн дөрөвт хурдлуулсан Хишигжаргалын Содномдорж хүүтэй  уулзаж баярын сэтгэгдлийг нь  хуваалцсан юм.
- Миний дүү хэдэн наснаасаа эхлэн хурдан морь унаж байгаа вэ?
- Намайг Хишигжаргалын Содномдорж гэдэг. Би дөрвөн настайдаа анх унаа морь унаж сурсан. Энэ жил арван настай. Сая саарал морио айргийн тавд хурдлууллаа. Баяртай байна.
-Анхны айраг түрүүгээ хэдэн оны ямар наадмаас авч байсан бэ?
-2014 онд анхны түрүүгээ хүртэж байсан. Өнгөрсөн жилийн улсын наадмаар Даш-Өлзий ахын хонгорыг айрагдуулсан.
- Уралдааны замд юун дээр илүү анхаардаг вэ?
- Уяачийнхаа захиснаар уралдахыг хичээдэг. Цоож ах “амыг нь сайн дарж яваарай” гэсэн болохоор дараастай явсаар үзүүр дээр нь хөдөлгөсөн. Уг нь түрүүлье гэж бодсон ч амыг нь татаж яваад айрагдуулчихлаа.
-Нийт хичнээн айраг, түрүү хүртээд байгаа вэ?
- Энэнтэй нийлээд найман айраг, түрүүтэй болж байгаа.
-Аль газрын наадам их сайхан санагдсан бэ?
-Би Дүнжингаравын хурд уралдаанд хоёр түрүүлсэн.Баянхонгорт улсад тавласан морио айргийн дөрөвт хурдлуулсан. Мөн Даш-Өлзий ахын цавьдар шүдлэнг аман хүзүүнд, эрлийз азаргыг нь айргийн дөрвөөр давхиулсан. Морь айрагдуулсан бүх газрын наадам гоё доо.
-Аль сургуулийн хэддүгээр ангид сурдаг вэ?
-60-р сургуулийн гуравдугаар ангид сурдаг.
-Морь унах дуртай. Өөр...?
-Би жудогоор хичээллээд хоёр жил болж байна. Энэ өвөл улсын аваргын тэмцээнд орсон ч медаль авч чадаагүй ээ.
- Ярилцсанд баярлалаа. Дүүдээ спортын өндөр амжилт хүсье.
А.Энхжил