Д.Цэрэнжигмэд: Том цолтой уяачид төрийнхөө наадмыг хүндэтгэн, морьдоо уяж, зөв сайхан оролцон, наадамчин олноо цэнгүүлэх үүрэгтэй

АХ-ын 94 жилийн ой, үндэсний их баяр наадамд хээр морио айргийн дөрөвт хурдлуулсан Говь-Алтай аймгийн Баян-Уул сумын уугуул, Тод манлай уяач Д.Цэрэнжигмэдтэй уулзан баярын сэтгэгдлийг нь хуваалцсанаа хүргэж байна.  

-Төрийнхөө их баяр цэнгэл наадамдаа их насны морь айрагдуулсан танд баяр хүргэе. Баярынхаа сэтгэгдлээс хуваалцахгүй юу?
-Баярлалаа. Сэтгэл их өндөр байна.Унаган морио айрагдуулах уяачийн хамгийн том баяр, бахдал шүү дээ. Тэр тусмаа их насны морь айрагдуулах сайхан байлгүй яахав. Дүүгийн маань шарга морь бас айрагдлаа.Унаган морьдоо айрагдуулсандаа дүү бид хоёр сэтгэл хангалуун байгаа.
-Нэг айлын гурван хүүгийн морьд түрүүлж, айрагдана гэдэг тэр болгон тохиох завшаан биш байх шүү?
-Тэгэлгүй яахав. Манай бага дүү Жамъяаны халиун азарга эрлийз дээд насанд түрүүлж, дүү маань төрийн наадмын анхны түрүүг хүртлээ. Буурал азарга өнгөрсөн жил айргийн тавд хурдалсан шүү дээ. Ийнхүү ах дүү гурав Макс угшлынхаа морьдоор сайхан наадаж байна. Бидний олон жилийн хөдөлмөрийн үр дүн шүү дээ. Хийсэн ажлынхаа үр дүнг харах ямагт сайхан байдаг. 
-Тод манлай төрийнхөө наадамд хэдэн насны морь мордуулсан бэ?
-Энэ жил нас болгонд нэгээс хоёр морь мордуулсан. Ган гачигтай байгаа болохоор заримыг нь замаас татуулсан ч хүүхэд, морь мэнд сайхан наадлаа. Наадмын хамгийн чухал тэр шүү дээ.
-Ах дүү Тод манлайгуудад  айраг, түрүү бөөндсөн наадмууд цөөнгүй тохиож байсан. Түүний нэг нь энэ жил боллоо?
-Тэглээ. Энэ жил “Макс” уяаныхан маань төрийнхөө наадмаас хоёр түрүү, хоёр айраг хүртлээ. Ер нь уяа зөв байхад морьд илүүтэй амжилт үзүүлдэг шүү дээ. Энэ жил манай уяа зөв, морьдын уналгаа эдэлгээ, онд оролт гээд эхнээсээ их сайхан байсан.
-Ингэхэд Тод манлай хэд дэх жилдээ төрийн наадамд морь мордуулж байна вэ?
-2000 оноос хойш. Тэр жил хамар цагаан хонгор морио зургаад давхиулж байсан. Уяач болгон төрийнхөө наадамд морь мордуулахыг хүсдэг. Энэ бол уяач хүн бүрийн хүсэл. Ялангуяа бидний  төрийн том цолыг авсан уяачид төрийнхөө наадмыг хүндэтгэн, морьдоо уяж, сайхан зөв оролцон, наадамчин олноо цэнгүүлэх үүрэгтэй.
-Тийм шүү. Улсын наадмыг залгаад бүсийн уралдаанууд болно. Хаана наадахаар төлөвлөж байгаа вэ?
-Өндөр Гэгээний наадамд очно доо. Манай ээж Өвөрхангай аймгийн Нарийн тээл сумын хүн шүү дээ. Тэр утгаар нь бидэнд урилга ирсэн. Арван жилийн өмнө Өндөр Гэгээн Занабазарын наадамд очиж Жигүүр хул азаргаа түрүүлгэж, соёолон, хязаалан айрагдуулан, Рагчаа маань түрүүлж байсан. Ер нь бид Ар, Өвөрхангайд их сайхан нааддаг юм. Магадгүй дээдчүүлийн буян заяа түшдэг байх. Манай өвөө Замбал гэж Ар, Өвөрхангайгаар сайхан нааддаг, бөх, морины цол дууддаг, хоёр ногоон морьтой сайхан уяач байсан.
-Дээдсийнхээ нутагт одтой сайхан наадаарай. Ярилцсанд баярлалаа.
-Баярлалаа. Та бүхний ажилд мөн амжилт хүсье.
А.Энхжил