Уралдаанч Б.Цэрэндаваа: Энэ жилийн наалам амжилт ихтэй, гоё болж байна

Тоосонд нь ороход бүтэн жилийн хийморь сэргээдэг соёолон насны төрийн их баяр наадамд түрүүлгэнэ гэдэг уяач, уралдаанчийн том бахархал билээ. Өнөө жилийн улсын баяр наадамд зээрд соёолонгоо түрүү магнайд, шарга морио айргийн гуравт, эрлийз дээд насанд халиун азаргаа түрүү магнайд хурдлуулсан адтай уралдаанч бол 111 дугаартай Батбуянгийн Цэрэндаваа.
-Өөрийгөө танилцуулаач?
-Батбуянгийн Цэрэндаваа, 12 настай.
-Төрийн их баяр наадамд амжилттай уралдлаа. Баяр хүргэе?
-Баярлалаа. Би соёолонгоо түрүүлгэн шарга морио айргийн гуравт, мөн эрлийз халиун азаргаа түрүү магнайд хурдлуулсан. Энэ жилийн наадам амжилт ихтэй, гоё наадам болж байна.
-Морь унаад хэдэн жил болж байна?
-Долоон наснаасаа хурдан морь унасан. Таван жил унаж байна.
-Энэ хугацаанд миний дүү ямар амжилт гаргаад байгаа вэ?
-2014 онд улс, бүсийн наадмаас хоёр түрүү, хоёр айраг хүртсэн. Д.Жамъян ахын халиун азаргы эрлийз дунд насны ангилалд айргийн таваар давхиулсан. Мөн сая айргийн гуравт хурдалсан шарга морио Ламын гэгээний даншигт түрүүлгэж, эрлийз дээд насанд Ариунсайхан ахын Хөөрхөн зээрдийг түрүүлгэж, зээрд даагыг нь айргийн тавд хурдлуулсан.
-Энэ жилийн хувьд хэдэн нас унасан бэ?
-Бараг нас болгонд унасан даа. Сайн явахгүй болохоор нь хязаалан, азаргаа замаас татчихсан.
-Аль сургуульд сурдаг вэ?
-59-р сургуулийн долдугаар анги.
-Морь унахаас гадна юу сонирхдог вэ?
-Хичээлдээ ч сайн. Мөн олон янзын спорт сонирхдог.
-Ярилцсанд баярлалаа. Дараа дараагийн уралдаануу­дад амжилт хүсье.

"Тод магнай" сэтгүүл №68