Уралдаанч Г.Мөнхболд: Айрагдсан болохоор ядарснаа ч мартчихлаа

Төрийн их баяр цэнгэл наадамд Завхан аймгийн Яруу сумын уугуул Монгол Улсын Тод манлай уяач Дашзэвэгийн Дагвадоржийн өсгий цагаан зээрд морийг 13 настай Ганбаатарын Мөнхболд хүү унан аман хүзүүнд хурдлуулсан. Авхаалж самбаа, ур чадвар гарган унасан хүлгээ айрагдуулсан уралдаанч хүүтэй уулзан баярын сэтгэгдэл хуваалцлаа.
-Миний дүүг хэн гэдэг вэ? Баярынхаа сэтгэгдлээс хуваалцаач?
-Намайг Ганбаатарын Мөнхболд гэдэг. Би 11 настай. Зээрд морьтойгоо аман хүзүүнд давхилаа. Их баяртай байна.  
-Улсын наадамд хэд дэх жилдээ морь унаж байгаа вэ?
-Төрийн наадамд гурав дахь жилдээ хурдан морь унаж байна.
-Өмнөх жилүүдэд унасан морьд нь яаж давхисан бэ?
-Өмнө нь улсын наадамд морио айрагдуулж байгаагүй. Сая анх удаа айрагдуулж байгаа юм. Зээрд морио аман хүзүүдүүлээд их гоё байна. Морио айрагдуулах гоё байдаг юм байна.
-Барианы зурхай даваад юу бодогдсон бэ?
-Айрагдчихлаа гээд гоё санагдсан.
-Уралдааны замд гарахад уяач нь юу гэж захисан бэ?
-Морио сайн амрааж яваарай. Ороолгож болохгүй, сууна шүү, бариа дөхөөд эхний таваас нь битгий салгаарай гэж захисан. Тэгж уралдаад л ороод ирсэн.
-Өнөөдөр их халуун байна ядрав уу?
-Наранд халаад их ядарсан. Гэхдээ айрагдсан болохоор ядарснаа ч мартчихлаа.
-Бүсийн уралдаанд уралдаж байв уу?
-Геннисийн уралдаанд уралдсан. Мөн Завхан аймгийн Яруу суманд хоёр очиж Дагвадорж ахынхаа морийг унасан. Азарга,  их морь, хязаалан түрүүлгээд, соёолон аман хүзүү,  шүдлэн айргийн гуравт хурдлуулж байсан.  
-Авхаалжтай хүү юм. Дараа дараагийн уралдаануудад нь амжилт хүсье. Ярилцсанд баярлалаа.

"Тод магнай" сэтгүүл №68