Уралдаанч М.Ганжигүүр: Энэ жилийн наадам хамгийн сайхан нь

Төрийн түмэн эх хээр халзан морины унаач Мөнхсоёлын Ганжигүүр хүүтэй уулзаж баярын сэтгэгдлийг хуваалцсанаа уншигч танаа хүргэе.

-Төрийнхөө их баяр цэнгэлд их насны морь түрүүлгэсэн хийморилог уралдаанчид баяр хүргэе. Манай уншигчдад өөрийгөө танилцуулахгүй юу?
-Баярлалаа. Намайг Мөнхсоёлын Ганжигүүр гэдэг. Энэ жил  арван нас хүрнэ. Анх удаа улсын наадамд морь унаад түрүүлгэсэндээ үнэхээр их баяртай байна. Барианы цагаан шугам даваад л түрүүлчихлээ гэж бодсон.
-Төрийн наадмын түрүү хүртэх бахтай байлгүй яахав. Манлай уралдааны замд гарахад тань юу гэж захисан бэ?
-Сайн дарж яваарай гэсэн. Бас хааяа хааяа давираарай гэсэн. Хэлсэн ёсоор нь дарж байгаад бариа руу дөхөөд ирэхээр нь  морио шахаад түрүүлгэсэн.
-Халуун наранд морь унах хэцүү байв уу?
-Хэцүү бишээ. Би морь унах дуртай. Үүнээс өмнө бүсийн наадамд морио айрагдуулж л байсан.
-Хэдэн настайгаасаа эхлээд хурдан морь унаж байгаа вэ?
-Зургаан настайгаасаа эхлээд дөрвөн жил хурдан морь унаж байна. Хамгийн анх Эрдэнэтийн наадамд морио айрагдуулж байсан. Түүнээс хойш олон газрын наадамд морио түрүүлгэж, айрагдуулсаан.
-Хамгийн их сэтгэлд хоногшсон сайхан наадмаа дурсаач?
-Энэ жилийн наадмууд. Сумын наадамд бас морь түрүүлгэсэн. Тэгэхэд их гоё байсан. Одоо улсын наадамд морио түрүүлгээд бүр гоё байна. Цаашдаа улам илүү хичээж олон түрүү авнаа.
-Ерөөлөөр болог. Дараа дараагийн уралдаануудад нь амжилт хүсье.

"Тод магнай" сэтгүүл №68