Уралдаанч Ж.Дашзэвэг: Азаргаа айрагдуулна гэдэгтээ итгэлтэй байсан

Сэргэлэн цовоо уралдаанч морио хэрхэн давхиулахаа уяачаас дутахгүй мэддэг. Тиймдээ ч хурдан хүлгийн амжилт гаргах уралдаанч хүүхдийн авхаалж самбаатай салшгүй холбоотой. Монгол орны өнцөг булан бүрээс ирсэн шандаст хүлэг, шилдэг унаачид үндэсний их баяр наадмаар Хүй мандалын ногоон дэнжид хурд хүчээ сорин уралдаж уяачийн жилийн хөдөлмөрийг үнэлүүлдэг. Жилдээ ганц тохиох энэ л баярт унасан хүлгээ айрагдуулсан уралдаанчийн буухиаг азарга, шүдлэнгээ айргийн тавд, эрлийз дунд насанд зээрд халзан үрээгээ айргийн гуравт хурдлуулсан Жаргалын Дашзэвэг үргэлжлүүлж байна.
-Азарга айрагдуулсан урал­даан­­­­­­чийн баярын сэтгэгдлээс яриагаа эхэлье.
-Намайг Жаргалын Дашзэвэг гэдэг. Хээр азарга, хүрэн шүдлэн хоёроо айргийн тавд, зээрд халзан үрээ айргийн гуравт орууллаа. Төрийн баяр наадамд унасан морьдоо айрагдуулаад баяртай байна. 
- Хэд дэх жилдээ хурдан морь унаж байгаа вэ?
-Би 14 настай, хурдан морь унаад найман жил болж байна. Улсын наадамд гурав дахь жилдээ уралдан азарга, шүдлэнгээ айргийн тавд, эрлийз дунд насанд айргийн гуравт хурдлууллаа. 2013 онд Чонон саарал шүдлэнгээ айргийн дөрөвт давхиулж байсан.
-Бүсийн уралдаануудад ямар амжилт үзүүлж байв?
-Ховд аймагтаа уралдаж байсан. Дорноговь аймагт болсон Хутагтын хурдад уралдсан.
-Хэн, хэний морийг унадаг вэ?
-Мэндсайхан ах, Батаа ах хоёрын морийг унадаг.
-Азарга уралдахаар гарахад Тод манлай юу гэж захисан бэ?
-Азаргаа айрагдуулна гэдэгтээ итгэлтэй байсан. Мөнхбат ах дарж уралдаарай л гэсэн.
-Ярилцсанд баярлалаа. Унасан морь нь хурдан байж олон айраг, түрүү хүртээрэй. 

А.Энхжил