“Босоо хүлэг” галын гишүүн З.Мэндсайхан: Улсын наадмын гурав дахь айргаа хүртлээ

А.Тэлмэн
2015 оны 8-р сарын 13 -нд

-АХ-ын 94 жилийн ойн баяр наадамдаа азарга айрагдуулсан танд баяр хүргэе. Баярынхаа сэтгэгдлээс хуваалцахгүй юу?
-За баярлалаа. Төрийнхөө их баяр цэнгэл наадамд азарга айрагдуулсандаа баяртай байна. Байгаль, цаг уурын нөхцөл хүндхэн байсан ч төрийн наадам сайхан боллоо. Уяачид маань ч дор бүрнээ хичээж морь малаа их сайхан уяж.
- Өнөө жил хэдэн насны морь мордуулж, азарганаас бусад нь ямархан амжилт үзүүлэв?
-Хоёр шүдлэн, нэг азарга мордуулсан. Хүрэн шүдлэн маань таваар давхиж, нөгөө нь 11-ээр ирлээ. Морьд маань сайхан өнгөтэй, сэтгэл өндөр байнаа.
-Өмнө нь улсын наадамд шүдлэн айрагдуулж байсан. Азарга айрагдуулах арай өөр мэдрэмж төрүүлэх юмуу?
-Төрийн наадмын хишиг их багын ялгаа юу байхав. Аль алинд нь баярлана шүү дээ. Наадмын эхний өдөр шүдлэн маань айргийн таваар давхилаа. Доороос сонсогдохгүй явсаар гэнэт л барианы өмнөхөн тав руу ороод ирсэн. Тэрэн дээр маш их баярласан. Хамгийн гол нь хүрэн үрээ маань миний өөрийн унаган адуу байгаа юм. Уяачид унаган адуугаа айрагдуулах шиг сайхан баяр бахдал хаа байхав. Хоёр жилийн өмнө унаган саарал үрээгээ улсад айрагдуулж анхны айргаа авч байсан бол өнөө жил хүрэн үрээ, хээр азаргаа айрагдууллаа. Мэдээж адуун сүргийн манлай азарга гэдгээрээ илүү баяртай байлгүй яахав. Энэ дашрамд хурдан хүлгийн маань уяа сойлгыг тааруулж өгсөн Мөнхбат ахдаа баярласнаа илэрхийлж, олон жил хамтдаа сайхан наадахын ерөөлийг дэвшүүлье.
-Бүсийн наадмын хичнээн айраг, түрүүтэй билээ?
-Архангай аймгийн 90 жилийн ой, хангайн бүсийн даншиг наадамд саарал шүдлэнгээ түрүүлгэж, Дүнжингаравын хурдад халтар морио айрагдуулсан.
-Ингэхэд хэзээнээс хурдан моринд шимтэж байгаа билээ?
-2011 оноос.
-Чонон саарлын нутгийн хүүгийн дээдчүүл хурдан хүлгийн сүүл шуудаг байв уу?
-Манай өвөг дээдэс, нагац аав бүгдээрээ л морины сүүл шуусан уяачид. Сайхан адуутай, сум орондоо сайхан нааддаг байсан улс. Манай аав бол бүр хүүхэд байхын өөрөө морио сургаж уяад, уралдуулдаг байсан гэдэг. Тийм хүмүүсийн дэргэд өссөн учраас өв соёлоо дээдэлж, морь уяж явна. 
Ер нь манай Мянгад нутаг чинь баруун Монголдоо хурдан хүлгүүдээрээ эртнээсээ алдартай. Ховд аймгийнхаа наадамд, ойр хавийн сумдын ойд гол төлөв Мянгадын морьд л өнгөлдөг. Тийм сайхан нутгийнхаа  нэрийг гаргаж, уул усаараа цоллуулж яваадаа баяртай байдаг юм.
-Мянгадын адуу бий юу?
-Найз нөхөд, ах дүү нарын бэлэглэсэн адуу бий.
-Ярилцсанд баярлалаа. Залуу хийморилог уяачийн дараа дараагийн уралдаануудад амжилт хүсье.
-Баярлалаа.

А.Энхжил

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна