Уралдаанч С.Буджав: Халиун азаргаа өмнө нь нэг түрүүлгэсэн

Төрийн наадамд газар газрын шигшмэл хурдан хүлгүүд тоосоо өргөн аз од нь гийсэн таван аавын хүүгийн хүлэг асрын өмнө алдар цолоо дуудуулдаг билээ. Энэ таван азтаны нэг болж унасан хүлгээ айргийн дөрөвт хурдлуулсан нь 953 дугаартай уралдаанч МУ-ын Алдарт уяач Сэргэлэнбаатарын хүү Буджаваас баярын сэтгэгдлийг нь хуваалцлаа.

- Баяр хүргэе. Улсын баяр наадамд хэд дэх жилдээ морь унаж байгаа вэ?
- Баярлалаа. Би анх удаа улсын баяр наадамд морь унаж байна. Анх уралдаад азаргаа айргийн дөрөвт хурдлууллаа. Их баяртай байна.
-Улсын наадмын дов ямар санагдав. Сандрав уу?
-Үгүй ээ. Уяач маань уралдааны замд гарахад “тархинд гараад ирвэл амыг нь дарж яваад, үзүүр дээр нь тавиарай” гэсэн юм. Хэлснээр нь уралдаад айрагдлаа. Их гоё байна.
-Анх хэдэн настайдаа морь унаж сурсан бэ?
-Долоон настайгаасаа эхлээд хурдан морь унаж байгаа. Энэ жил 13 настай.
-Анхны айргаа хаанахын ямар наадмаас хүртэж байв?
-Сүхбаатар аймгийн “Жавхлант шаргын хурд” уралдаанд аавынхаа уясан хонгор хязааланг айрагдуулж  байсан. Мөн  Сүхбаатар аймгийнхаа 70 жилийн ой, зүүн бүсийн уралдаанд  аавынхаа уясан морийг унаж уралдсан.
- Халиун азаргаа сунгаанд  мөн унасан уу?
-Тэгсэн. Энд ирэхээсээ өмнө  Сүхбаатар сумын наадамд түрүүлсэн юм.
-Аймагтаа болох зүүн бүсийн уралдаанд уралдах байх.  Хүлэг, эзэн хоёрт амжилт хүсье.
-Баярлалаа.

А.Энхжил