Уралдаанч Ч.Бямбажав: Уяачийнхаа хэлснээр дарж уралдсан

2014 онд улс, бүсийн наадмаас нэг түрүү, долоон айраг хүртсэн амжилтаараа ММСУХ-ны шилдэг уралдаанчдын нэгд эрэмбэлэгдсэн “Түмний эх” галын уралдаанч Чогдонгийн Бямбажав өнөө жил шилдгээ дахин баталж төрийнхөө  наадмаас нэг түрүү, нэг айраг хүртсэн юм. Хурдан морь унаад хоёр жил болж байгаа ч өндөр амжилт үзүүлээд буй бяцхан унаачтай уулзан баярын сэтгэгдлийг нь хуваалцлаа. 

-Азарга айрагдуулж, хязаалангаа түрүүлгэсэнд баяр хүргэе?
- Баярлалаа. Сэтгэлд өндөр сайхан байна. Загал хязаалангаа түрүүлгэн  төрийн наадмаа амжилттай эхлээд өнөөдөр хээр азаргаа айргийн гуравт хурдлууллаа. Хязаалан мордоход Онон ах “Айрагдах байхаа, амыг нь дарж яваад үзүүр дээр нь хөдөлгөөрэй” гэсэн юм.  Үрээ маань эхний тав дотор гараад ирэхээр нь хэлснээр нь дарсан. Тэгээд түрүүлчихлээ. Сайхан байна.
-Энэ жил хэдэн насны морь унасан бэ?
-Гурван нас унасан. Хязаалан түрүүлгэж, азарга айрагдуулж, их морь зургаалуулсан.
-Өнгөрсөн жил мөн амжилт арвин сайхан наадсан?
-Тиймээ. 2014 онд улсын наадмаас дөрвөн айраг, бүсийн уралдаанаас нэг түрүү, гурван айраг хүртэж ММСУХ-ны шилдэг уралдаанчаар  шалгарсан. Эхний өдөр Бага янзагаа  гурваар давхиулж, загал шүдлэнгээ аман хүзүүдүүлсэн.  Гурав дахь өдөр нь хар даага, сартай зээрд соёолон аман хүзүүнд хурдлуулсан. Улсын наадмын дараа Дорнодод очиж загал үрээгээ түрүүлгээд, Янзагаа дөрөвт,  хар даага, хээр морио гуравт давхиулсан.
-Ингэхэд хэдэн жил хурдан морь унаж байгаа юм бэ?
-Би өнгөрсөн жилээс л хурдан морь унаж байгаа. Онон ах намайг морь унаж сургасан юм.
-Шилдэг уралдаанчийн дараа дараагийн уралдаануудад амжилт хүсье.

А.Энхжил