Шандас, шөрмөсний гэмтлийг оношлох нарийн мэргэжлийн аппарат оруулж иржээ

Морин уралдааны хөгжлийн явцад хурдан морины эмгэгийг оношлох орчин үеийн технологиуд улам бүр нарийсан хөгжиж байна. Хурдан морины эмгэгүүд дотор хөлний эмгэг гэмтэл голлох хувийг эзэлдэг ба үүн дотроос зөөлөн эдийн буюу шандас шөрмөсний гэмтэл нь 90 хүртэл хувийг эзэлдэг нь судалгаагаар тогтоогджээ. Монголын морьд холын зайд хатуу, жигд бус гадаргуу дээр уралддаг учир түүнийгээ дагаад хөлний гэмтэл бэртэл авах нь элбэг. Тэрхүү бэртлийг бид шөрмөсөө цохих, нүдлэх, цус буух гэх зэргээр нэрлэж ирсэн ч шинжлэх ухааны үүднээс шөрмөс, шандасны гэмтэл хэмээн нэрийддэг аж.
Шөрмөс шандасны гэмтлийн нэг онцлог нь цаг хугацаа алдах тусам эмчилгээ авах магадлал нь буурч байдаг учир гэмтлийг аль болох эрт зөв оношилж, тохирох эмчилгээг хийх хэрэгтэй байдаг. Уралдааны морины хөлний бэртлийг дэлхийн хөгжилтэй орнуудад эхо машин буюу ультра туяаны тусламжтайгаар оношилдог болоод багагүй хугацаа өнгөрч байна. Эхо машинаар оношлох нь мэс ажилбаргүйгээр хөлний зөөлөн эдийг нэвт харах боломж олгодог бөгөөд адуунд ямар ч хоргүй оношилгооны арга юм. Монголын залуу малын эмч нар нэгдэж энэхүү хөлний шандас, шөрмөсний гэмтэл оношилгооны машиныг эх орондоо оруулж  ирэн оношилгоо, эмчилгээ хийж байгаа баярт мэдээг уншигч танаа дуулгаж байгаадаа бид баяртай байна. Дээрх эмч нарын нэг нь Ирландын мал эмнэлэгт дадлага хийж, эхо машинаа хэрхэн ашиглах талаар суралцсан Монголдоо ирснээс хойш нэлээд хэдэн адууны хөлөнд оношлогоо, эмчилгээг амжилттай хийсэн байна.
Эрхэм уншигч, уяачид, хурдан морины зүтгэлтнүүд та бүхэн өөрийн хурдан хүлэгтээ анхаарал хандуулж шандас, шөрмөсний гэмтэл байгаа эсэхийг оношлуулахаар шийдсэн бол 8606-1950 утсаар холбоо бариарай.
Түмний магнайг тэнийлгийгч хурдан хүлгүүд эрүүл байг.