Уралдаанч Н.Пүрэвбаяр: Улсын наадамд анх морь унаад, азарга түрүүлгэлээ

Их Монгол улс байгуулагдсаны 809, АХ-ын 94 жилийн ойн үндэсний их баяр наадамд газар газраас чуулсан 193 хурдан азарга шандас шалган уралдсан. Энэхүү уралдаанд авхаалж самбаагаа дайчлан унасан хүлгээ түрүү магнайд хурдлуулсан уралдаанч Нямдоржийн Пүрэвбаяр хүүтэй уулзаж ярилцлаа.
- Унасан хүлгээ түрүүлгэсэнд баяр хүргэе?
- Баярлалаа. Азаргаа түрүүлгэлээ гоё байна. Барианы зурхай даваад л түрүүллээ гээд их баярласан. 
- Хэд дэх жилдээ улсын наадамд морь унаж байна вэ?
- Энэ жил л анх удаа уралдаж байна. Хязаалан үрээгээ 12-оор давхиулсан.
- Улсын наадам юугаараа онцлог байна?
- Олон хүүхэд уралдаж байна. Улсын наадмын зам нь гоё юм. Замд шороо их байсан ч саадгүй морио орууллаа.
- Гарахад уяач нь юу гэж зөвлөсөн бэ?
- Өнгөн дээр гараад ирвэл битгий шахаарай гэсэн.
- Бүсийн уралдаанд уралдаж байв уу?
-Энэ жил Сэлэнгэд болсон хаврын бүсийн уралдаанд айргийн гуравт оруулсан. 2014 онд Алтангэрэлийн халтар азаргыг Налайх, Төв аймаг, Зүүнхараагийн наадмуудад айргийн тавд хурдлуулсан.
- Гурван жил морь унаж байгаа гэсэн эхний жилээ ямар амжилт үзүүлсэн бэ?
-Төв аймгийн наадам болон өөр жижиг уралдаануудад уралдсан.
-Анхны айргаа хэдэн оны ямар наадмаас авсан бэ?
-2014 онд Налайхад болсон уралдаанд халтар азаргаа айргийн тавд хурдлуулж анхны айргаа хүртсэн.
-Аль сургуулийн хэддүгээр ангид сурдаг вэ?
-Би 11 настай. Улаанбаатар хотын Сонгинохайрхан дүүргийн 106 дугаар сургуульд сурдаг. Одоо зургаадугаар ангид орно.
-Пүрэвбаяр сайн унаач юм. Өөр ямар авьяастай вэ?
-Хөл бөмбөг тоглодог.  Багийнхаа довтлогч.
-Спортын өндөр амжилт хүсье. Ярилцсанд баярлалаа.

А.Энхжил