Унаач М.Намуунхишиг: Том болоод бэлэгний адуугаараа наадна

Дорноговь аймгийн Иххэт сумын унаач М.Намуунхишиг хүүгийн яриаг уншигч танаа хүргэж байна.
-Миний дүү  манай уншигчдад өөрийгөө танилцуулна уу?
-Намайг Намуунхишиг гэдэг. Би Иххэт сумын дунд сургуулийн гуравдугаар ангид сурдаг. Зургаан наснаасаа эхлэн хурдан морь унаж байгаа. Энэ хугацаанд Энхтогтох, Мөнхбат, Буянхишиг гэх ах нарынхаа морийг унаж байсан. Анх 2012 онд Иххэт сумандаа Бор ахын /Энхтогтох/ хонгор азаргыг унаж тавлуулсан нь анхны айраг байгаа юм. Тэгэхэд бас даагыг нь тавлуулсан. Дараа нь хонгор азаргатайгаа Алтанширээд уралдаад аман хүзүүдүүлж, Дархан сумын наадамд даага дөрөвлүүлсэн. Дэлгэрэхэд Буянаа ахын шүдлэнг унаж аман хүзүүдүүлсэн. 2013 онд Бор ахын хонгор даагатай сумын наадамд түрүүлсэн. Дахиад тэр даагаа уулын наадамд тавлуулсан. Өндөр ахын /ээжийн дүү Мөнхбат/ зээрд азаргыг сумын хаврын уралдаанд хорин хэдээр оруулсан. Энэ өндөр ах намайг анх морь унаж сургасан хүн  шүү дээ.
-Аав, ээж нь ямар ажил хийдэг вэ?
-Ээж Иххэт сумын Засаг дарга, аав жолооч. Аав маань моринд дуртай л даа. Гэхдээ өөрөө уяхгүй, малчнаараа уяулдаг.
-Морь унахад хамгийн гоё нь юу вэ?
-Би моринд дуртай. Тиймдээ ч морь унана гэж зөрсөөр байгаад унаач болсон. Мэдээж салхи татуулан давхиж явах сайхан шүү дээ. За тэгээд айраг, түрүүнд хурдалвал бүр ч гоё. Гэхдээ дандаа амжилттай уралдаж чадахгүй. Нэг уралдааны үеэр бариан дээр гурван даагыг эзэд нь ташуурдсаар байгаад оруулаад би долоолчихоод зөндөө уйлсан. Тэгэхэд би зургаан настай байлаа.
Морь унаад би хувийн хэдэн адуутай болсон. Буянаа ах маань нэг алаг даага, өндөр ах зээрд шүдлэн, Бор ах хоёр унагатай гүү бэлэглэсэн. Том болоод өөрийнхөө адуугаар наадна даа.
-Морь унаад ямар, ямар шагнал авсан бэ?
-2012 оны амжилтаараа шилдэг унаач болж ном, сэтгүүл дээр гарч, өргөмжлөл, мөнгөн шагнал авсан.  Хонгор азаргатай их олон удаа айрагдсан.  Бас уяач ах нар маань дандаа л баярлуулдаг юм.  Мөн айраг, түрүүнд хурдлахад наадам зохион байгуулж хүмүүс их гоё бэлэг өгдөг. Хичээлийн хэрэгсэл, цүнх, ундаа, шоколад гээд амттан. Надад энэ бүхэн таалагддаг шүү. Энд нэмж сонирхуулахад, нэгдүгээр ангидаа хотод очиж дүүдүү машины аваргаар тодорч байлаа.
-Тэмцээн юм уу?
-Машинаа зэрэг гулсуулж уралддаг юм. Гэхдээ ямар бэлэг авснаа санахгүй байх чинь ээ. Бас  сургуулийнхаа шилдэг сурагч болж байлаа. Тэгэхэд би 33 smile цуглуулсан юм.
-Шилдэг сурагч болсон гэхээр онц сурдаг байх нь ээ?
-Тиймээ, онц сурдаг. Тоо, монгол хэл, зураг урлал, хүн орчин, төсөл ажил, дуу хөгжмийн хичээлдээ их дуртай.
-Том болоод ямар мэргэжилтэй болох вэ?
-Одоогоор сонгоогүй л байна. Гэхдээ морио хэзээ ч хаяхгүй ээ. Аравдугаар анги хүртлээ морь унаж, дараа нь ажлынхаа хажуугаар морь уяна гэж бодож байна.
-Хүсэл мөрөөдөл бүхнээ биелүүлсэн, сайн хүн болоорой. Ярилцсанд баярлалаа.

"Тод магнай" сэтгүүл Дорноговь аймгийн тусгай дугаар