Ахмад дайчин, Алдарт уяач Б.Дашдорж: Ороо морины ганган толгойд Уургынхаа хуйвыг алдаж үзээгүй

Өмнөговь аймгийн 15 сумдаас хамгийн олон улсын цолтонтой нь Ханхонгор юм. Ухаа хязаалангаа “Говьшанхын хурд-1” бүсийн уралдаанд аман хүзүүнд хурдлуулж, унаган адууны амжилтаар улсын цолонд хүрсэн В.Наранмандал Алдарт, дээдсийн буян халзан, ухаа азаргануудаараа улсын Алдартад эрэмбэлэгдсэн Ц.Шоовдор нарын өмнө уран уургачаараа гайхагдсан Б.Дашдорж уяач энэхүү цолонд хүрсэн байдаг билээ.

Б.Дашдорж агсан 1919 онд  Өмнөговь аймгийн Ханхонгор сумын Өгөөмөр багийн нутагт малчин Будын гэр бүлд төржээ. Бага насаа эцэг эхийн гар дээр өнгөрөөн, гар хөлийнх нь үзүүрт зарагдан тусад орсон тэрээр эр бие жагсаж цэргийн албанд мордон, хоёр ч дайнд оролцсон хувьсгал тэмцлийн зүтгэлтэн, ахмад дайчин юм.
Эх орон дуудсан зургаан жилийн албаа нэр төртэй хаасан тэрээр нутагтаа ирсэн даруйд нэгдэлжих хөдөлгөөнд идэвхитэй оролцон, таван ч багийн даргаар ажиллаж байсан гэдэг. Ийнхүү нэгдэл нийгмийн ажилд манлайлан оролцож байсан Б.Дашдорж ажлынхаа завсар зайгаар хурдан хүлгийнхээ уяа юуг тааруулж, 50 гаруй жил наадахдаа ганзага хоосон буцсан нь үгүй. Чухам түүнийхээ үр шимээр Ханхонгор сумынхаа нэрийг гарган 1993 онд МУ-ын Алдарт уяач хэмээх эрхэм цолны эзэн болсон юм. Нутаг адуугаар урамтай сайхан нааддаг Алдартыг тэр хавийнхан нь Жанжаа хэмээн авгайлж, мэдэхгүй чадахгүйгээ нууж хаалгүй асууна. Жанжаа ч мэддэгээ харамгүй хэлнэ. Ийм л сайхан налайсан буурал Ханхонгор нутгийнхаа нөмөр нөөлөг болон залуу хойчоо бэлтгэж байсан бөгөөд өдгөө үр хүүхэд, ач зээ нар нь зэлийг нь гундааж, хусуурыг нь хатаалгүй гийнгоо хадааж явна.