Хакнэ үүлдэр

Эртнээс Хакнэ үүлдэрийн морьдыг холын зайн уралдаанд илүү оролцуулж, тэргэнд хөллөх буюу унах байдлаар уралдуулдаг байжээ. Нарийн хөлтэйгээрээ ялгардаг энэ үүлдэрийн адуу араб болон цэвэр цусны адуу шиг алдартай Норфолкын хатирч үүлдэрээс гаралтай ба дараа нь цэвэр цусны адуутай цус холилдсон байна. XVII дугаар зуунд энэ үүлдэрийн морьд хэд хэдэн чухал тэмцээний түрүүг авсанаар нэрд гарч Англид “Хакнэ” нийгэмлэг үүсгэн байгуулагджээ. Уг үүлдэрийг үржүүлэхдээ уналгын болон хөллөгөөний морьдыг гарган авахад анхаарч, тэргэнд хөллөсөн хакнэ үүлдэрийн морь дээд тал нь цагт 25 км хурдлах амжилтанд хүрч байв. Одоо үед хакнэ үүлдэр хөнгөн гоёмсог төрхтэй, идэвхитэй хөдөлгөөнтэй, шалмаг сайхан алхаа гишгээтэй хөллөгөөний морьдоороо алдартай. Энэ үүлдэрийн адууг пони болон хакнэ угсааны адууг тэмдэглэсэн омгийн бичигт хамт тусгасан байдаг.
Хэрэглээ: Эхэндээ хакнэ үүлдэр уналгын адуу байсан бол одоо гол төлөв хөллөгөөнд хэрэглэх болжээ. Хакнэ үүлдэр спортын тэмцээн болон жагсаал парадад илүү амжилт олж байгаа тул түүнийг адууны үүлдэр угсааг сайжруулах зорилгоор үржүүлгэд ашиглаж байна.
Гадаад төрх: Хакнэ үүлдэрийн морийг хажуугаас нь харвал хүзүү нь нарийн хэсэгтээ дугуйрсан, босоо чихтэй, нуруу шулуун боловч хондлой дээрээ яламгүй товгор, өтгөн сүүлтэй, хойд хөлнүүд арагш тавигдсан байгаа нь хөдөлгөөний тэнцвэр сайтай, хурдан шинжийг илтгэнэ. Хакнэ үүлдэр адуу голдуу хар, хээр, зээрд зүстэй байх ба толгой хөл дээрээ цагаан толботой бйах нь элбэг. Туурай цомбон хэлбэртэй ба хэт өргөн байх ёсгүй, шивнүүр нь шулуувтар байна.
Ялгарах онцлог: Хакнэ үүлдэрийн морьд эрэмгий, зүтгүүр, ихээхэн эрч хүчтэй байдаг. Уян хатан хөдөлгөөнтэй ба хойд урд хөлөө өндөр өргөн нисэх мэт уран гоёмсог хатирна. Хатирахдаа хойд хөлнүүдээ нэлээд урагш тавьж, гайхалтай хөнгөн хөдөлгөөнтэй мэт харагддаг. Энэ хөдөлгөөн нь удамшсан байдаг. Хатирааны хурд нь дасгал сургуулилтаас хамаардаг байна.
Сэрвээний өндөр: 1,42-1,60 метр

"Дэлхийн адуу" ном

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна