Аймгийн Алдарт уяач Д.Баатархүү:Манай уяаныхны морьд сүүлийн жилүүдэд хурдалж байгаа

Завхан аймгийн Нөмрөг сумын уугуул, аймгийн алдарт уяач Д.Баатархүүгийн ярилцлагыг хүргэж байна.
-Унаачаас уяачийн гараагаа эхэлсэн уяачид цөөнгүй. Алдарт багадаа хурдны морь унаж байв уу?
-Уналгүй яахав. Санжаадорж ахынхаа морьдыг унаж, 1983 онд хээр даагыг нь аман хүзүүнд хурдлуулж байлаа. Мөн Ёрвоо гуайн хээр морийг унаж Нөмрөгийн наадамд айрагдуулж байсан.Тэгэхэд тэр хөгшин намайг хожим нь сайн уяач болно хэмээн урам хайрлаж халзан цагаан хониор мялааж байлаа. Ерөөлийн хадагтай ирсэн халзан хонь их өсч олуулаа болсон шүү.
-Буурлын үг хэзээнээс биеллээ олсон бэ?
-1995 оны үеэс л эхэлж бие даан морь уясан даа. 
-Уяаны эрдмийн А үсэг заасан багш тань...?
-Манай ах. Ахынхаа морийг унаж байхдаа л наад захын дөр сууж 1995 онд цоохор даагаа уяж айрагдуулж байлаа. Цоохор үрээ маань хязаалан, соёолондоо сумандаа түрүүлж нас нийлсэн хойноо нэг айрагдсан.
-Хурд адислагдаж, урам хайрласан ажнай хүлгүүдийнхээ талаар хуучлаач?
-Дааган цагаасаа хурдалсан хар үрээ маань байна. Даагандаа Идэр суманд болсон Ялгуусан Гэгээний наадамд түрүүлж анхны мотоцикль авч өгөөд шүдлэндээ сумынхаа баяр наадам, Идэр суманд болсон Хамбын наадамд аман хүзүүдэж, Сонгино сумын 50 жилийн ойд айрагдсан. Харин хязааландаа сумынхаа баяр наадамд түрүүлж, соёолондоо тавласан. Мөн 2010 онд Сүхбаатар аймгийн Асгат сумын харьяат Гонио гэдэг хүний адууны бор даагыг саяар авч Тэлмэн сумын 70 жилийн ойд гуравлуулж, Идэр сумын 80 жилийн ойд тавлуулсан.
-Зүүн зүгийн адуу арай өөр байгаа биз?
-Тэгэлгүй яахав. Бор үрээ маань шүдлэндээ сумынхаа баяр наадамд аман хүзүүдэж, Хөндлөнгийн болон Сантын овооны тахилгад түрүүлсэн. Өнгөрсөн жил сумынхаа ойд айрагдаад, Тосонцэнгэл сумын 90 жилийн ойд таваар давхисан. Мөн Сүхбаатар гаралтай хээр үрээгээ Идэр сумын 80 жилийн ойд түрүүлгэж, Тэлмэний алаг морины нэрэмжит уралдаанд аман хүзүүдүүлсэн. Тэгээд хязааланд нь Ган-Идэр гэдэг найздаа зарсан Эрдэнэхайрхан, Түдэвтэй сумдын наадмуудад айрагдсан байна лээ.
-Унаган болон авмал адуу аль аль нь хурдалдаг юм даа?
-Тийм шүү. Хурдан буянгуудынхаа буянаар 2012 онд аймгийн Алдарт уяач цолыг хоёр түрүү, дөрвөн айргийн амжилтаар авсан. Сүүлийн жилүүдэд Далх-Очир, Түмэндорж, Очир нарын уяачидтай хамтран морьдоо уяж байна. Манай уяаныхны морьд ч гэсэн тогтмол амжилттай хурдалж байна.
-Дараа дараагийн уралдаануудад тань амжилт хүсье.

"Тод магнай" сэтгүүл №54