Ө.Пүрэвбаатарын Жигүүр саарал дуутай болжээ

Аймгийн Алдарт уяач, “Хөх чоно” группийн захирал Ө.Пүрэвбаатарын Жигүүр саарал хэмээх хурдан ажнайд зориулсан дуу мэндэлжээ. Шинэхэн уран бүтээл болох “Жигүүр саарал” дууны үгийг зохиолч Г.Даваасүрэн, аяыг УГЗ Ц.Пүрэвхүү нар зохиож,  МУГЖ, “Морины” хэмээх Г.Батбаяр дуулж олны хүртээл болгосон байна. 
Жигүүр саарал
Нүүрэнтэйн цэцэгт талдаа
Нисээд ирсэн Жигүүр саарал
Нацагдоржийн домогт судраас
Амилаад үүрссэн шувуун саарал
Хөх чонын гал хаялсан
Хурц харуул нүдтэй юм аа
Хөх Монголын уухай болсон
Хуй салхин давхилтай юм аа
Гүн галуутайн цэнхэр талаас
Дүүлээд ирсэн Жигүүр саарал
Галтай найрагчийн зүрхнээс
Цахилаад ирсэн шувуун саарал
Хөх чонын сонор болсон
Бадам хоёр чихтэй юм аа
Хөх Монголын баяр наадмын
Бадрам гэрэлтэх одтой юм аа
Цэн нууртай илчид талаас
Цойлоод ирсэн Жигүүр саарал
Онгод найргийн ширүүн мөндрөөс
Оройлон шуугих шувуун саарал
Хөх чонын зориг болсон
Цөс улаан очтой юм аа
Хөх Монголын сүлдэнд мөнхөрсөн
Молор эрдэнэ хийморьтой юм аа... /2015.04.02 /

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна