Монгол Улсын Алдарт уяач Н.Юмжигмэд

Төрдөө үнэлэгдэж, түмэндээ хүндлэгдсэн эрхэм  бол МУ-ын Алдарт уяач Н.Юмжигмэд агсан юм. 1935 онд Сэлэнгэ аймгийн Баруунбүрэн суманд төрж, 73 настайдаа бурхны хүлгийн уяа тааруулахаар одсон буурал уяач 2000 онд  улсын цолоо гардан авч байжээ. 22 наснаас хурдан хүлгийн уяа тааруулах болсон тэрээр 1971 онд Орос руу гаргадаг тууврын адуунаас халиун морийг 100 төгрөгөөр худалдан авч уян  Сэлэнгэ аймгийн баяр наадамд дөрөв түрүүлгэн, хоёр аман хүзүүдүүлж, АХ-ын 50 жилийн ой, улсын баяр наадамд 11-ээр давхиулсан байдаг. Энэ бол Алдарт уяачийн хувьд төрийн наадмын торгон ногоон дэвжээнд уясан хүлгийн шандсыг шалгасан анхны тохиол байлаа. Түүний дараа 1996 оны хоёр хязаалан үрээтэй очиж тав, зургаагаар давхиулсан нь баяр наадмын цуваанаа тэмдэглэгдэн үлджээ. Дээрх үрээнүүд нь Оросоос орж ирсэн буурал азарганы төл бөгөөд эцэг нь соёолондоо Сэлэнгэ аймгийн наадамд түрүүлж байсан хүлэг аж. Буурал азарганы үр төлүүдээс Монгол Улсын Манлай уяач Онгуу, “Дэрэнгийн хурд” компанийн захирал Гочоо нар авч, Гочоогийн хонгор азарга нь Сүхбаатар аймгийн Асгат сумнаа хурдлан эзний магнайг тэнийлгэж байдаг гэх юм билээ. Н.Юмжигмэд Алдарт хурдан морь шинжихдээ гаргуун нэгэн байсан аж. 
Б.Долзодмаа