Аймгийн Алдарт уяачдын цол, тэмдгийг гардууллаа

Хөвсгөл аймгийн “Дэлтэй цэнхэр” МСУХ-ны тэргүүлэгчдийн хурлын тогтоолыг үндэслэн “аймгийн Алдарт уяач”цолны болзол хангасан нэр бүхий уяачдад цол олгох тухай аймгийн Засаг дарга А.Эрдэнэбаатарын  захирамж гарсан. Тэрхүү захирамжийн дагуу аймгийн Алдарт уяач цолны болзол хангасан Их-Уул сумын уяач Б.Ганболд, Жаргалант сумын уяач Ж.Гомбосүрэн, Тариалан сумын уяач Б.Ганбаярт нарт хаврын тэргүүн сарын шинийн наймны уралдааны үеэр “Дэлтэй цэнхэр” МСУХ-ны нарийн бичгийн дарга, аймгийн ИТХ-ын дарга Т.Болдбаатар батламж, энгэрийн тэмдгийг нь гардуулан өгсөн юм. Харин Тариалан сумын ахмад уяач Г.Даваасамбуу, О.Баасанцэрэн нарын цолыг шинийн арван тавны зүүн бүсийн уралдааны үеэр гардуулж, Цэцэрлэг сумын ахмад уяач С.Батаагийн батламж, энгэрийн тэмдгийг сумын МСУХ-оор дамжуулан хүргэхээр болсон байна.
Аймгийн Алдарт уяач хэмээх эрхэм цол хүртсэн нийт уяачддаа уясан хүлэг бүхэн нь хурдан, уралдаанч хүүхэд нь сэргэлэн цовоо байж Монгол наадмын дэвжээнд олон айраг түрүү хүртэж байхыг ерөөлийг өргөн дэвшүүлье.
“Дэлтэй Цэнхэр” МСУХ-ны ажлын алба