Монгол улсын 2014 оны шилдэг холбоод

ММСУХ морин жилийн шилдгүүдээ тодруулж, шагналыг 2-р сарын 17-нд төрийн ордонд гардуулсан билээ. Энэ удаа бид уншигч танаа морин жилийн шилдэг холбоодыг танилцуулж байна.
Шилдгийн шилдэг салбар холбоо:
2014 оны шилдгийн шилдэг аймгийн салбар холбоогоор Сэлэнгэ аймгийн “Буган халиун ажнай” МСУХ шалгарлаа. Тус холбоо нь 2014 онд 17 бүтээлч ажлыг төлөвлөн, түүнийгээ 100 хувь хийж гүйцэтгэсэн байна. Тэрхүү бүтээлч ажлуудаас дурдвал:
-Аймгийн морь барианы газартаа монгол, эрлийз морьдыг ялгах тусгай талбайг засч тохижуулсан
-Аймгийн нийт уралдаанч хүүхдийн 90 хувийг хамгаалалтын хувцсаар хангаж, гэнэтийн ослын даатгалд 100 хувь даатгуулсан.
-Сэлэнгэ аймгийн ЗДТГ, Хүүхэд гэр бүлийн хэлтэс, Хөдөлмөрийн хэлтэс, "БУГАН ХАЛИУН АЖНАЙ"  МСУХ хамтран Сэлэнгэ  аймгийн 17 сум, гурван тосгоны уралдаанч хүүхэд, уяачид оролцсон уулзалт зөвлөгөөнийг амжилттай зохион байгуулсан.
-Сум бүрийн төлөөлөл нэг хүнийг аймгийн МСУХ-ны итгэмжлэгдсэн морь шүдлээч болгон бэлтгэсэн.
-Аливаа уралдаан наадмыг зохион байгуулахдаа аймаг, сумдын Засаг даргын зөвшөөрлийг авч хэвшүүлсэн
-90 жилийн ойгоо тэмдэглэсэн сум бүрийн уралдааны замтай танилцан, тус бүрийг нь гарааны төхөөрөмжтэй болгосон.
-Монгол орноо морьтой тойрсон “Морьтон монгол” төслийн залуучуудыг угтан авч долоон морь бэлэглэн, эмчийн үзлэгт хамруулан, эд материалын болон сэтгэл санааны тусламж үзүүлсэн.
Шилдэг салбар холбоо:
2014 оны шилдэг салбар холбоогоор Дундговь аймгийн “Нарны хүлэг ” МСУХ шалгарлаа. Тус холбоо нь оны эхэнд 22 зорилтот ажил санаачлан тэргүүлэгчдийнхээ хурлаар хэлэлцэн баталж, түүнийгээ ажил хэрэг болгосон байна.
-Аймгийн хавар, зуны  бүсийн уралдааныг гурван бүсэд хуваан амжилттай зохион байгуулсан.
-Засгийн газрын тогтоолт “Их мандал-3” төвийн бүсийн хурдан морины уралдааныг 2014 оны 07-сарын 25-27-ны өдрүүдэд амжилттай зохион байгуулсан.
-Аймаг болон сумын МСУХ 2014 онд 131 уралдааныг амжилттай зохион байгуулсан.
-90 жилийн түүхт ойгоо тэмдэглэсэн долоон сум тус бүрийг гарааны төхөөрөмжтэй болгосон.
-Уралдаанч хүүхдийн эрхийг хамгаалах, хамгаалалтын хувцас хэрэгслэлээр хангах, даатгалд бүрэн хамруулах ажлыг тогтворжуулсан.
-Аймгийн  МСУХ-ны удирдлагууд бүх сумаар тойрч уулзалт зөвлөгөөнийг зохион байгуулсан.
-Дундговь аймгаас төрсөн улс, аймгийн алдар цолтой  уяачид болон домогт хурдан хүлгүүдийн түүхийг өгүүлсэн “Дундговь аймгийн уяачдын алтан товчоо” номын нэгдүгээр ботийг хэвлүүлэн гаргасан.
-Тухайн жил цол авсан нийт уяачдын баяр болгож хаврын бүсийн уралдааныг “Алдартын баяр” нэртэйгээр зохион байгуулж хэвшүүлсэн.
-Бүх салбар холбоодын санхүүгийн бие даасан байдлыг тогтворжуулсан.
-Аймгийн үндэсний хурдан морины уралдааны түүхэн бүртгэлийг хөтөлж эхэлсэн.
-Эрхүү хот руу уяачдаа аялуулж, туршлага судлуулсан
-Тухайн жилийн шилдэг морь, шилдэг уяач, шилдэг уралдаанч хүүхдийн зураг бүхий календарийг бэлтгэж гаргадаг болсон.
Шилдэг сумын салбар холбоод:
1. Булган аймгийн Хишиг-Өндөр сумын “Бишрэлт гүний хурд” МСУХ
2. Говь-Алтай аймгийн Жаргалан сумын “Шувуун хээр” МСУХ
3. Дундговь аймгийн Цагаандэлгэр сумын  “Мөнхийн хүлэгтэн” МСУХ
4. Өмнөговь аймгийн Цогтцэций сумын “Шанхын хүлэг”  МСУХ
5. Өвөрхангай аймгийн Бат-Өлзий сумын “Орхоны хурд” МСУХ
6. Архангай аймгийн Батцэнгэл сумын "Дайт бор" МСУХ

А.Тэлмэн, фотог Ч.Ганболд