"Тод магнай" сэтгүүлийн шинэ дугаар гарлаа

Хатуу өвөл харьж
Урин хавар айсуй
Хамаг бэрхшээл үлдэж
Угтах баяр айсуй
Буурал жил улирч
Буянт жил морилж
Өвгөн жил харьж
Өлзийт жил зочилж буй энэ цаг дор  уншигч танаа шинэхэн дугаараа өргөн  барьж байна.
62 дахь дугаарын зочин хойморт хурдны өлгий нутгийн хийморилог хүү Жамъянсүрэнгийн Түмэн-Аюуш уригдан оролцлоо.
“Тамирын хурд-3” төвийн бүсийн уралдаанд Янзага  хул соёолонгоо айрагдуулж, Галшар адууны гайхамшгийг дахин мэдрүүлсэн түүнийг үндэсний болон их спортын дэмжигч гэдгээр нь онцлон сар шинийн дугаарын зочин хойморт урьсан юм. 
Сэтгүүлийн дараагийн хуудсанд хонин жилийн сар шинийн босгон дээр  амжилт бүтээлээ дүгнүүлэн алдар цол авч буй эрхмүүдийн танилцуулга багтсан. Морин жилд Монгол Улсын Тод манлай уяач гурав, Манлай уяач долоо, Алдарт уяач 16-гаар нэмэгдэж буй баярт мэдээг урьтан дуулгаж буйдаа баяртай байна.
Уламжлалт “Аяны богц” буланд энэ удаа Баянхонгор аймгийн Баацагаан сумынхан оролцож, түүхт 90 жилийнхээ ойн баяр наадмын талаарх сэтгэгдлээсээ хуваалцлаа. Алтангадас одонт сумын ойн баяр ямархан цар хүрээтэй болсныг та бүхэн 48-64 хуудаснаас тольдоорой.
Хурдан морь сонирхогч залуу уяачдадаа зориулсан ”Эмч зөвлөж байна” булан энэ удаа хурдан морины хөлний өвчнийг мэс заслын аргаар хэрхэн эмчилж болох талаарх мэдээллийг хүргэлээ.
Харин “Мэдэхэд илүүдэхгүй ”булан цагаан зүсмийн адууг ямар угсаа гарвалтай хүн унах ёстойгоос эхлээд өөр олон сонирхолтой мэдээллийг  багтаасан байгаа.
Эрхэм уншигч та бүхэн энэ мэт олон талт мэдээ мэдээллийг сэтгүүлийн дараа дараагийн хуудаснаас тольдоорой.

"Тод магнай" сэтгүүлийн шинэхэн дугаараа "Интер" номын салбар дэлгүүрүүд болон сонин, сэтгүүл борлуулах цэгээс, мөн редакцийн 94082992, 95092992 дугаарын утсанд холбогдож аваарай.