Дорнодчууд “Жавхлант шарга”-д сайхан наадлаа....

Сүхбаатар аймгийн “Жавхлант шарга” Морин спорт, уяачдын холбооны аварга хүлэг шалгаруулах дээд гурван насны хурдан морины хаврын уламжлалт уралдаан өнгөрөгч ням гараг буюу шинийн 4-нд Баруун-Урт хотод амжилттай зохион байгуулагдлаа. Монгол орны өнцөг булан бүрээс том цолтой уяачид, хурдан морь сонирхогчид энэ уралдааныг зорин ирж түрүүлж, айрагдсан хурдан морийг шинжин,  үнэ цохин  худалдан авдаг бөгөөд төвийн  зочид буудлууд нь дүүрч, гудамжинд нь жип машинууд багтаж ядан  чихцэлдэн байдгийг  та бид мэдэх билээ. 
Манай аймгийн уяачид энэ довон дээр одтой сайхан наадаж ирсэн бөгөөд хамгийн анх зохион байгуулагдсан уралдаанд нь Хэрлэн сумын харьяат, аймгийн Алдарт уяач /гаалийн/ Л.Энхболд их насны хүрэн морио түрүүлгэж байсан түүх уламжлагдан 2004 онд аймгийн Алдарт уяач И.Намжил гуай цагаан соёолонгоо айрагдуулж байлаа. Матад сумын харьяат МУ-ын Алдарт уяач Б.Цэндбаатар 2010 онд Тугал хул азаргаа, 2012, 2013 онд Улс халзан азаргаа түрүүлгэж, Яруу саарал, буурал цоохор зүсний их насны морьдоо айрагдуулж , Цагаан-Овоо сумын харьяат, МУ-ын Алдарт уяач Т.Батзориг 2013 онд хээр азарга айрагдуулж, их насны хүрэн морь айрагдуулж байсныг би бээр тодхон санаж байна.  
Энэ удаад хурдны өлгий нутаг Сүхбаатар аймгийн буянгууд  чуулсан довон дээр Дорнод аймгийн Баянтүмэн сумын хоёрдугаар багийн харьяат Мангалжавын Тогмидын уясан хар морь их насны 150 гаруй алтан тууртаас аман хүзүүнд хурдалжээ.  Булган сумын харьяат “Туг”  ХХК-ийн захирал Х.Чулуунбаатар гуайн унаган хүлэг энэхүү хар морь нь энэ жил дүнсэр долоон настай, өнгөрөгч 2014 оны зургаан сард анх хавчиг морь уягдаж Буяндэлгэр овооны тахилга наадамд  аман хүзүүнд, Булган овооны тахилга наадамд түрүүлсэн бол, долдугаар сард Булган сумын түүхт 90 жилийн ойд 21-т хурдлаад, наймдугаар сард  Халхгол сумын 90 жилийн ойн баяр наадамд дутуу эргэсэн морьдод уралдаж хасагдсан. Есдүгээр сард Баянтүмэн сумын харьяат, МУ-ын Алдарт уяач А.Дондов гуайн Алтангадас одонгийн мялаалга наадамд дахин аман хүзүүдсэн байна.  Харин 2015 он гарсаар Баянтүмэн суманд болсон сунгаанд ам нь татаастай хол тасархай түрүүлж, улмаар Сүхбаатар аймагт аман хүзүүнд хурдалсан нь энэ ажээ.
Дашрамд сонирхуулахад, энэ удаагийн “Жавхлант шарга" уралдаанд их насанд түрүүлсэн буудан морь нь Дорнод аймгийн Баян-Уул сумын нэгдүгээр багийн харьяат Х.Ганхуягийн унаган хүлэг бөгөөд өнгөрсөн 2014 онд сумынхаа түүхт 90 жилийн ойд айргийн дөрөвт хурдлаад хоёр оны зааг дээр Сүхбаатар аймаг руу зарагдсан хүлэг юм байна.
Дорнод аймгийн МСУХ-н НБДарга Б.Батсайхан