2013 оны шилдэг уралдаанч Б.Нямтөгс: Түрүүлдэг болохоор хул морио л унах дуртай

Хэнтий аймагт ажиллах үеэр Батноров сумын сурагч, 2013 оны шилдэг уралдаанч Б.Нямтөгстэй ярилцсанаа хүргэж байна.
-2013 оны шилдэг унаач, хэдэн настайгаасаа хурдан морь унаж байгаа вэ?
-Би дөрвөн наснаасаа морь унасан. 2011 онд Овооны наадамд будан халиун буудай морио түрүү магнайд хурдлуулсан нь миний анхны амжилт байсан. Тэгээд халиун буудай морио Хурхын 30 жилд түрүү магнайд, аймагт зам ангийн 80 жилийн ойд аман хүзүүнд хурдлуусан. Тэр жилээ хул морьтойгоо Бэрх суманд түрүүлээд, бас нэг овооны наадамд түрүүлсэн.
-Нэг удаадаа  хичнээн морь унаж байна вэ?
-Энэ жил сумынхаа наадамд соёолонгоос бусад бүх насыг унасан.
-Миний дүү ямар морио илүү унах дуртай вэ?
-Түрүүлдэг болохоор хул морио л унах дуртай. 
-Мэдээж уралдааны замд морио хэрхэн давхиулах уу гэдэг унаачаас шалтгаалдаг. Ямар тактик барьж уралддаг вэ?
-Урдуур л уралдахыг хичээнэ. 
-Танай энд төхөөрөмж ашиглаж байна уу?
-Манайд төхөөрөмж ашигладаггүй. Харин аймгийн 90 жилийн ойгоор төхөөрөмж хэрэглэсэн. Дасаагүй болохоор морь үргээд хойхнуур эргэсэн ч яг үзүүр дээр ирж түрүүлсэн дээ.
-Нямтөгсийн хамгийн сайхан наадам хэзээ байсан бэ?
-Аймгийн 90 жилийн ойгоор үргээд холуур эргэсэн ч гэсэн хул морь хол түрүүлсэн. Тэр наадам хамгийн гоё, их баярлаж байсан.
-Тэр үед хойшоо эргэж хараад л яваад байв уу?
-Үгүй, урагшаа хараад л давхичихсан. Хамаагүй хойшоо харахаар зарим морь хулждаг, гэхдээ хул морь номхон болохоор хулждаггүй л дээ. Түрүүлнэ гэж бодоод л уралдсан.
-Улсын шилдэг унаач болохдоо шагналаа өөрөө очиж авсан уу?
-Тийм. Өгсөн шагнал нь гоё чихэр, жимс, дэвтэр номтой. Би жимсэнд дуртай.
-Морио сайн давхиулахаар аав нь яаж шагнадаг вэ. Энэ дугуйг авч өгсөн юм уу?
-Аав хувцас авч өгдөг. Харин энэ дугуйг өөрийнхөө бярууг хотын таньдаг хүнд зараад авсан юм.
-Зурагтаар гарч байгаа уралдаануудыг үздэг үү?
-Үздэг.
-Унаач хүүхдүүдтэй хэр их танилцдаг вэ?
-Батсуурь ахын унаачийг танина. Аймгийн 90 жилийн ойгоор Сүхбаатар аймгийн Мөнх-Оргил гэж хүүхэдтэй танилцсан. Манай аймагт морио айргийн таваар оруулсан юм.
-Түрүүн чавх хийгээд байсан. Юу хийх гэж байсан юм?
-Оготно алах гэж байгаа юм. Манай энд оготно ихтэй. Нүхэнд нь морь бүдрээд хөлөө авчих гээд байдаг юм. Тэгээд л .../инээв/
-Морио сайн унаарай. Бидний ярилцлагыг хүлээн авч ярилцсанд баярлалаа. Амжилт хүсье.

Б.Долзодмаа