Баянтүмэнгийн манлай хурдууд

Дорнод аймгийн Баянтүмэн сумын МСУХ манлай хурдуудаа магтан дуулсан ийм нэгэн дуутай болжээ.

Шүлэг: Д.Ган-Очир/МЗЭ-ийн шагналт, яруу найрагч/
Ая: Г.Энхбаяр/СГЗ хөгжмийн зохиолч/
Дуучин Ж.Саруул
БАЯНТҮМЭНГИЙН МАНЛАЙ ХУРД
/Баянтүмэнгийн хурд уяачдын холбооны сүлд дууны шүлэг оршвой/
Давхиад л баймаар даанч сайхан  нутагтаа
Даагнаасаа алдар цолоо дуудуулсан
Баянтүмэнгийн хурдыг нь 
Бахархан магтаад барашгүй еэ.
Тал шигээ наадам нь цэнгэлтэй
Тал шигээ холын давхилтай
Тал шигээ тэнүүн эрсийн
Талын хурдны магнай Баянтүмэнгийн хүлгүүдээ.
Дахилт:
Талын салхинаас хүүхдийн гийнгоо цангинасан
Тааж хэлэхийн аргаггүй хурдан хүлгүүдээс
Барааны газраас сугарч давхисан
Баянтүмэнгийн хүлгүүд байна аа хө.
Хэрлэн голын усаар умдаалж сэргэх адуу нь
Хээр талдаа торгон жолоо өргүүлээд
Баянтүмэнгийн хүлгүүд нь
Баялаг өвгөдийн эрдэм юм аа.
Тал шигээ адуу нь талбиун
Тал шигээ уяач нь эрдэмтэй
Тал шигээ унага нь жаргалтай
Талын хурдан хүлгүүд нь Баянтүмэнгийнх ээ.
Дахилт:
Талын салхинаас хүүхдийн гийнгоо цангинасан
Тааж хэлэхийн аргаггүй хурдан хүлгүүдээс
Барааны газраас сугарч давхисан
Баянтүмэнгийн хүлгүүд байна аа хө.
Ерөөл:/Эхлэл/
Асрын өмнө дүүхэлзсэн
Адууны манлай хүлгүүдийн
Алдар цолыг дуудваас
Босоо жаргалын Чонон-Хөхтөөс эхлээд
Жамбаа Дондовын цагаан, борлог, ухаа
Чойжинжавын Хүрэн, хээр
Гантөмөрийн Мэнгэт хээр
Шадавын хээр,Сүрэнгийн хээр
Хүрлээгийн хар морь
Ажвайн зул хонгор
Нямрагчаагийн саарал
Мөнгөөгийн Со-хүрэн
Ёндонгийн зэрэглээ бор
Бямбаагийн хонгор, Аргамжаа саарал
Эрдэнэбаатарын хар ногоон
Даваагийн алаг, Жаргалын ухаа
Дугарын хув хүрэн, Идэрийн мөлүү хээр
Цэгмидийн ухаа, Энхээгийн хув хүрэн
Өлкийн шарга, Буянтогтохын халтар
Отгонбаатарын даншиг улаан
Эдгээр хурдан хүлгүүд нь
Хулан хоёр чихтэй
Хун сүмбэр хошуутай
Үнэхээрийн хурдан хүлгүүд минь ээ
Хан-Ууландаа идээний дээжээ өргөсөн
Хамаг ардын өмнө түрүү манлай болсон
Баянтүмэнгийн уяачдын
Бадрах хийморь өөдөө юм аа
Дахилт:
Талын салхинаас хүүхдийн гийнгоо цангинасан
Тааж хэлэхийн аргаггүй хурдан хүлгүүдээс
Барааны газраас сугарч давхисан
Баянтүмэнгийн хүлгүүд байна аа хө.