Сумын Алдарт уяач Л.Отгонням: Би хоёр талын удамтай гурав дахь үеийн уяач

“Би өөрийгөө адуугүйгээр төсөөлдөггүй. Хэдэн адууныхаа дэргэд байвал түүнээс илүү жаргал үгүй юм. Адууны буянгаар  л хүний дайтай явна даа. Хүлэг морьдоо сайн уяж түмнийхээ итгэлийг даасан сайн уяач болох хүсэл зорилготой” хэмээн ярьсан уяач бол өнгөрөгч 2014 оноос өөрийн нэртэй адуунуудаар амжилттай наадаж буй сумын Алдарт уяач Лхагвасүрэнгийн Отгонням юм. Тэрээр хоёр талын удамтай гурав дахь үеийн уяач бөгөөд багадаа сургуулиас гарч хурдан морь унаж байгаад хасагдан морины уяа эвлүүлжээ. Түүний уяа сойлгыг нь тааруулдаг цавьдар азарга, хар морь нь Өлзийт сумын 2014 оны шилдэг азарга, шилдэг их насаар тодорсон байна. Цавьдар азарга өвөө аймгийн Алдарт уяач Б.Шатарын нэртэй бөгөөд энэ адууны талаар дээр өгүүлсэн билээ. Ээжийнх нь аав мөн олон хурдан бор адуутай аймгийн Алдарт уяач Давдаваа гэж хүн бий гэнэ.
Хар морины тухайд тэдний унаган адуу. Эцгийнх нь эцэг Хэнтий аймгийн Галшар сумын Дугаржав гэж хүний унаган буурал азарга байсан. Харин эцэг нь 2001 онд сумандаа түрүүлсэн  буурал азарга аж. Хар морь даагандаа долоо уралдаж хоёр айрагдан, шүдлэндээ хоёр уралдаж, хязаалан насандаа аймгийн баяр наадамд аман хүзүүдээд Гурван-Сайхан болон  Өлзийт сумын наадамд түрүүлсэн байна. Намар нь Өөшийн наадамд соёолонтой уралдаж аман хүзүүджээ. Дараа жил нь соёолон Өлзийт сумандаа зургаалаад,  Луусын наадамд түрүүлж,  Дундговь аймгийн 70 жилийн ойд тархинд уралдаж байгаад 23-т хурдалсан байна. Зургаан насны морьдоо Ланд-200 маркийн автомашинаар байлсан энэ наадамд Л.Отгонням соёолон, шүдлэн хоёроо сойж тэд нь өнгөнд зарлагдсаар 20 гаргаж давхисанд залуу хүний хувьд урам орсон гэнэ. Сүүлийн хэдэн жил Дундговь  гандуу өвс ургамал тааруу байгаа тул тэрээр Дорноговь аймгийн Даланжаргалан суманд оторлоод хоёр, гурван жил болж байгаа юм.

У.Энхмаа