Оны шилдэг, сумын Алдарт уяач П.Эрдэнэчулуун: Хурдан буяны хишгээр шилдэг уяач болсондоо баяртай байна

Дуу хуурын өлгий Дундговь нутагт зохион байгуулагдсан “Их Мандалын хурд-2014” төвийн бүсийн наадамд хонгор үрээгээ айрагдуулсан амжилтаар сумын Алдарт уяач П.Эрдэнэчулуун Өлзийт сумын Оны шилдэг уяач болжээ. Хонгор үрээ Сүхбаатар аймгийн Уулбаян сумын “Дэлгэр” багийн Д.Дорждэрэм хэмээх залуугийн унаган адуу бөгөөд 2013 онд шүдлэн үрээ авчраад хязаалан насандаа Сайнцагаан сумын 90 жилийн ойд зургаалж, мянгат малчны наадамд айрагдаад, төвийн бүсэд сайхан хурдалсан буянт хүлэг юм.
Дөмөг адуу хүнийг олон сайхан хүмүүстэй танилцуулдаг гэдэг. П.Эрдэнэчулууны цагаан азарга Дундговийн баруун талд танил болсон бөгөөд Өндөршилийн Жадамбын Бандийн цагааны угшилтай адуу. Аав нь анх даага авчирч, шүдлэн Луус сумын наадамд наймалж, 1991 онд  хязаалан насандаа Дундговь аймгийн  50 жилийн ойгоор мөн наймалж, давхар уяагаар Луус сумын наадамд аман хүзүүдсэн. Мөн Дундговь аймагт нэг айрагдаж, Өлзийт суманд нэг түрүүлж, нэг аман хүзүүдэн, Луус сумын наадамд хоёр аман хүзүүдэж, тус суманд болсон түмэн адууны баярт дөрвөлсөн байна.
Тэрээр уралдааны морь унаж байгаад хүнддэж хурдан хүлгийн сүүл шуусан удам дамжсан уяач юм. Цэргээс ирэхэд аав нь Сайнцагаан сумын “Дэнхэр” хэмээх Ичинхорол гэдэг хүнээс соёолон хүрэн халзан үрээ авч өгч азарга тавьжээ. Тэр жил буюу 1987 оны намар Луус сумын хойно Хадбаатар аварга, харлаг Жавзмаа зэрэг мундаг бөхчүүд ирж зодоглосон өтгөн наадам болоход хүрэн үрээ зургаалсан байна. Авга ах аймгийн Алдарт уяач Дамбий хүрэн азаргыг авъя гэж асуухад нь “сайн нь сайн юм, гэхдээ уяж чаддаг хүндээ очиг” гээд өгчихсөнөөс хойш Луус суманд олон түрүүлж, айрагдсан бөгөөд одоо ч удам угсаа нь хурдалсаар байгаа ажээ.
Шилдэг уяач маань бусдын нэгэн адил зүүн зүгийн адуугаар цус сэлбэн адууныхаа чанар чансааг сайжруулж, Сүхбаатар аймгийн Түмэнцогтоос Сайрийсүрэнгийн Төмөр-Очирын унаган азарга, Мөнххаан сумын харьяат, аймгийн Алдарт уяач Д.Сайнбаяраас Баадуу угшилтай хоёр азарга, мөн сумын Доржпүрэв гэх аймгийн Алдартын нэг хээр үрээ авчирсан нь сайхан хурдалж хэд хэд айрагдсан байна. Яваандаа шинэ цагийн монгол адуутай болох бодолтой явдаг гэнэ.

У.Энхмаа