Уяач Б.Энхбаатар: Хээр соёолон маань зургаа уралдаж хоёр түрүүлэн, дөрөв айрагдлаа

Булган аймгийн Хутаг-Өндөр сумын уяач Б.Энхбаатар сумынхаа 90 жилийн ойд хурдан соёолонгоо түрүүлгэжээ. Түүний баярын сэтгэгдлээс хуваалцсанаа хүргэж байна.

-Нутгийнхаа ойд соёолон түрүүлгэсэн хийморилог эрхэмтэй ярилцаж байгаадаа таатай байна. Баяр наадмынхаа сэтгэгдлээс манай уншигчидтай хуваалцахгүй юу?
-Сэтгэл өндөр байлгүй яахав. Төрөлх сумынхаа 90 жилийн ойн баяр наадамд соёолон түрүүлгэлээ. Хээр соёолон маань давхар уяагаар МУ-ын Манлай уяач Дамбын Хишигжаргалын мялаалга наадамд аман хүзүүдсэн.Энэ жил хээр үрээ бид хоёр сайхан наадлаа.
-Хурдан хээрийнхээ удам угшлыг танилцуулаач?
-Сүхбаатар аймгийн Түмэнцогт сумын харьяат Өлзий-Орших гэдэг хүний унаган адуу. Хүргэн маань надад бэлгэнд өгсөн юм. Даагандаа төдийлөн амжилт үзүүлээгүй ээ, арав гаргаад л давхиад байсан. Харин шүдлэн болсон жилээ 6-7 уралдаж аймгийн наадамд айрагдсан. Өнгөрсөн жил хязааландаа хөл нь жаахан эвгүйтээд сумынхаа наадамд зургаалж, бас нэг наадамд долоолсон. Энэ жилийн тухайд хавраас хойш зургаа уралдаж хоёр түрүүлэн, дөрөв айрагдлаа.
-Уралдсан болгондоо түрүүлж айрагдаж байгаа юмаа даа?
-Тиймээ. Энэ жил их хурдан байгаа. Ер нь уралдсан цагаасаа эхлээд түрүү айргаас мултарч үзээгүй болохоор сумынхан маань “Аварга хээр”л гэдэг юм.
-90 жилдээ хэдэн насны хичнээн морь мордуулсан бэ. Соёолонгоос бусад нь яаж давхив?
-Гурван насны морь мордуулсан. Даага арван хэдээр, хязаалан 20 гарч давхилаа.
-Морь уяад олон жил болж байна уу?
-Уг нь би чинь хөдөө өвөө дээрээ өссөн хүн. Өвөөгөө бурхан болсноос нь хойш аавынхаа дүүтэй нийлж морь уядаг болоод зургаан жил болж байна.Сүхбаатар аймгийн Түмэнцогт, Хэнтий аймгийн Дэлгэрхаан зэрэг сумаас хурдан адуу авсан. Төрийн наадмын түрүү Босоо хээр азарганы эзэн Сүрэнхор агсны хамаатны ах Дамдинсүрэн манай хадам аав байгаа юм.
-Тэгэхээр Босоо хээрийн угшлын адуу бол бий л юм байна?
 -Тиймээ, бий.
-Хурд ирлэж, уяа тааруулах болсноос хойш ямар амжилт үзүүлээд байгаа вэ?
-Аймаг, сумын наадмаас нийлээд 15-16 айраг, түрүү авсан байна лээ. Сая манай сумын уяачдын холбооны тэргүүн материалаа явуулаарай гэж байсан. Энэ жил сумын цолонд тодорхойлох байх.
-Сэтгэлд хоногшсон сайхан наадмын дурсамжаар яриагаа өндөрлөе?
-2012 онд суманд гурваар давхисан шүдлэнгээ аймгийн наадамд авч очоод дөрвөөр давхиулж байсан. Тэр наадам л их сайхан санагддаг юм.
-Сэтгэлд хоногшсон бахдалт наадмууд олон байх болтугай. Ярилцсанд баярлалаа.

Б.Долзодмаа