Уяач Б.Гончиг: Би 30 гаруй жил морь уяж буй дөрөв дэх үеийн уяач

-Нутгийнхаа ойн баяр наадамд одтой сайхан наадан хурдан хүлгээ айрагдуулсан танд баяр хүргэе. Баярынхаа сэтгэгдлээс хуваалцаач?
-Сэтгэл өндөр сайхан байлгүй яахав. Аман хүзүүнд хурдалсан хүрэн халзан даага маань Цээл сумын харьяат, МУ-ын Алдарт уяач Пүрэвийн Баяраагийн унаган адуу. Унага байхад нь өнгөрсөн өвөл 11 сард эхтэй нь хамт аваад тэжээж эхэлсэн. Хавар Сэлэнгийн Орхонтуулд болсон бүсийн уралдаанд дөрвөөр давхисан. Мөн Молцог элсэнд болсон бооцоот уралдаанд аман хүзүүдэж, сумандаа болсон уралдаанд түрүүлсэн. Зун нь Атарын наадамд түрүүлээд, сумынхаа ойд аман хүзүүдэж байгаа юм. Ер нь энэ жил арав уралдаж арав орчихоод байгаа  адуу.
-90 жилийнхээ ойн баяр наадамд хэдэн насны морь мордуулсан бэ?
-Их нас 13-аар, азарга 15-аар, соёолон 23, 24-өөр давхилаа. Хязаалангаа явуулаагүй. Даага маань аман хүзүүдсэн ч нутгийн уяач гэдгээрээ портероор шагнуулсан. Зохион байгуулагчид нутгийн уяачдын урмыг сэргээх басхүү ойдоо идэвх зүтгэлтэй оролцуулах үүднээс нас болгонд хамгийн дээгүүр давхисан адууны эзнийг машинаар шагнахаар шийдвэрлэсэн юм билээ. Тэр дагуу портер машинаар шагнуулсан. Би 30 гаруй жил морь уяж олон газрын наадмаас айраг түрүү авч байсан ч анх удаа л машинаар шагнууллаа. Сэтгэл өндөр байна. Өмнө нь сумынхаа ойд морь айрагдуулж байсан. Гэхдээ ийм өндөр шагнал авч байгаагүй. Энэ бол нутгийн уяачдаа дэмжсэн зөв алхам гэж бодож байгаа.
-Улсын наадмаас хорь гаруй айраг хүртсэн Угтаалцайдам сумын уяачдын нэлээд хэсэг нь удам дамжсэн эрхмүүд байдаг. Таны хувьд?
-Би дөрөв дэх үеийн уяач болно. Миний эцэг морь мал их уядаг байсан гэдэг. Намайг багад бурхан болчихсон болохоор би төдийлөн сайн мэдэхгүй л дээ. Харин миний том ах Халзан гэж хүн морь сайн уядаг байлаа.Завхан аймгийн Отгон сумын хүн  байсан. Одоо манай хоёр хүү хоёулаа морь уядаг. Сая 90 жилийн ойгоор нэг хүүгийн маань азарга аман хүзүүнд хурдалсан. Миний хувьд Жаргалантад болсон Төв аймгийн хойд бүсийн уралдаанд хоёр их насны морьтой очиж нэгийг түрүүлгээд, нөгөөг нь аман хүзүүнд хурдлуулсан. Мөн аймгийнхаа баруун бүсийн уралдаанд нэгийг нь түрүүлгэж, нөгөөг нь дөрвөөр давхиулсан. Сэлэнгийн Орхонтуулд болсон бүсийн уралдаанд ч айрагдуулсан. Хавар Булганы Хишиг-Өндөрт болсон уралдаанд нэг морь маань аман хүзүүдсэн. Энэ мэтчилэн яриад байвал зөндөө зөндөө. Хурдан тууртууд минь намайг бишгүй  баярлуулдаг юм. 

"Тод магнай" сэтгүүл №59