Сумын Алдарт уяач С.Сүхбаатар: Хүрэн үрээ нэг түрүүлж, нэг айрагдаад байгаа нь энэ

-Таны уясан  хүрэн хязаалан айргийн гуравт хурдалж, унасан хүүхдийн хийморийг өргөлөө. Баяр хүргэе?
-Баярлалаа. Хүрэн үрээ Угтаалцайдам сумын Засаг дарга Н.Гантулгын адуу. Би уяач нь байгаа юм.
-Хурдан хүлгийнхээ удам угшил, амжилтыг товчоог танилцуулах нь зүйтэй байх?
-МУ-ын Алдарт уяач Пүрэвийн Баяраагийн унаган адуу. Шүдлэнд нь аваад сумынхаа наадамд түрүүлгэж, сая  хязааландаа гурваар давхилаа. Даагандаа сумынхаа наадамд зургаад хурдалж байсан юм билээ. Хүрэн үрээний эцэг нь Алдартын хурдан хар азарга юм билээ. Морь сонирхогчид Зангадын хар гэхээр мэдэх байх.
-Сумынхаа баяр наадамд л уралддаг  юмаа даа?
-Энэ жил 7 дугаар сарын 3-нд  суманд болсон МАН-ын өдөрлөгт дөрвөөр давхиад, 7 дугаар сарын 6-нд Төв аймгийн Цээл сумын наадамд түрүүлсэн. Сумын 90 жилийн ой гурав дахь наадам нь байсан.Хүрэн үрээний байнд ирсэн машиныг эзэн нь сумын эрүүл мэндийн байгууллагад  бэлэглэсэн.
-Бусад нас хэрхэн давхисан бэ?
-Бүгд л модтой давхисан даа.
-Өнгөрсөн жил улсын наадамд аман хүзүүдсэн үрээгээ уяагүй юм уу?
-Уялгүй өнжөөсөн.
-Морин жил гарсаар Сүхбаатар Алдартын хувьд ямархан амжилттай наадсан бэ?
-Хавар Баянцогт суманд  болсон уралдаанаас хойш  тав зургаан айраг авсан байхаа.
-Хонь жил танд хишгээ харамгүй хайрлах болтугай. Ярилцсанд баярлалаа.

"Тод магнай" сэтгүүл №59