Сумын Алдарт уяач Б.Пүрэвбат: Энэ жил одтой сайхан наадсан

Төв аймгийн Угтаалцайдам сумынхаа 90 жилийн ойд одтой сайхан наадсан нутгийн хийморилог уяачдын ярилцлагыг хүргэж байна.

 -Сумынхаа ойд их насны морь түрүүлгэн, нутгийн олноо баясгасан танд баяр хүргэе.
-Баярлалаа.
-Хурдан хүлгийнхээ удам угшлыг танилцуулахгүй юу?
-2009 онд манай ээжийн төрсөн дүү Гантөмөр ах маань хязааланд нь бэлгэнд өгсөн адуу байгаа юм.Тэр хавраас нь эхэлж уяад цэргийн баярт зориулсан багийн өдөрлөгийн уралдаанд түрүүлгэж, соёолон морь намар нь Баянцогтын цэцэрлэгийн  50 жилийн ойд аман хүзүүдээд, Атарт болсон уралдаанд таваар давхисан.Тэгээд энэ жил сумынхаа 90 жилийн ойд түрүүллээ.
-Даага, шүдлэндээ яаж давхиж байсан гэдэг вэ?
-Ерөөсөө уягдаж байгаагүй битүү адуу. Эцэг нь морин тойруулга гаралтай хээр халзан азарга.Харин эх нь манай адууны угшилтай ногоон гүү байгаа юм. Сумын 90 жилийн ойн баяр наадмын дараа Булган аймгийн Дашинчилэн  сум руу явж  наадаад  их морь маань 24-өөр давхиж, зээрд соёолон маань айрагдсан. Тэр зээрд соёолон өмнө нь сумын ойд мөн айргийн дөрвөөр давхисан адуу.
-Сумынхаа ойд хэдэн насны морь мордуулсан бэ?
-Таван насны морь мордуулж, их морь түрүүлгэн, соёолон айрагдуулж, хязаалан 27,шүдлэн дөч, даага хорь гаргаж давхисан даа.
-Өмнөх ойн баяр наадмуудад оролцож байв уу. Ямар амжилт үзүүлж байсан бэ?
-80 жилийн ойгоор  азарга унаж аман хүзүүнд хурдлуулж байсан бол өнөө жил их морь түрүүлгэж, соёолон айрагдууллаа. Энэ жилийн баяр наадам  өргөн дэлгэр сайхан болсон. Залуу хүний хувьд сумынхаа түүхт ойд  морь түрүүлгэж, портер машинаар шагнуулсандаа баяртай байна. Морь уяснаас хойш анх удаа ийм том шагнал авч байна.
-Хэдий үеэс морь уяж байгаа вэ?
-Хамгийн анх 17 настайдаа Заамар сумын дунд сургуулийн 80 жилийн ойн баярт  даага аман хүзүүдүүлж уяачийнхаа гарааг эхэлж байлаа. Өнгөрсөн жил цагаан сарын өмнөхөн гаргасан амжилтыг маань үнэлэн сумын Алдарт уяач цол олгосон. Хоёр жилийн өмнө найз Гансүхээсээ  зээрд үрээ худалдан авч, өнгөрсөн жил сумынхаа наадамд  болон Цээлийн наадамд тус тус аман хүзүүдүүлсэн.
-90 жилийн ойд айрагддаг зээрд соёолон мөн үү?
-Мөн мөн, энэ жил сумынхаа наадамд дөрөвт давхиад, Атарт болсон уралдаанд айрагдаж, Дашинчилэнгийн наадамд гурваар давхисан. Ер нь энэ жил их хурдан байгаа. Миний хувьд ч гэсэн одтой сайхан наадлаа.
-Залуу уяачийн дараа дараагийн уралдаануудад амжилт хүсье. Ярилцсанд баярлалаа.
"Тод магнай" сэтгүүл №59