Сумын Алдарт уяач Л.Хишигсүрэн: Унаган азаргаа айрагдуулж машинаар мялаалгалаа

Түүхт 90 жилийн ойдоо амжилттай наадсан Төв аймгийн Угтаалцайдам сумын хийморилог уяачдын нэг сумын Алдарт уяач Л.Хишигсүрэнтэй ярилцсан юм.

-Сумынхаа түүхт 90 жилийн ойн баяр наадамд хурдан хээр азаргаа айргийн дөрвөөр хурдлуулсан танд баяр хүргэе?
-Баярлалаа.Миний хул хээр азарга Угтаалцайдам сумынхаа түүхт 90 жилийн ойн баяр наадамд айргийн дөрөвт хурдалж, намайг болон нутаг орныхныг минь баярлууллаа. Хээр азарга маань миний өөрийн унаган адуу. Эцэг хүрэн азарга  нь сум орон нутгийнхаа наадамд  түрүүлж айрагдаж байгаагүй ч дээгүүр давхидаг хурдан хүлэг бий. Харин эх нь Жаргалантын  морин зоводын гаралтай хар гүү байсан юм.
-Хээр азарганы амжилтын гараа хэдий үеэс эхэлсэн бэ?
-Дааган цагаасаа уягдсан адуу байгаа юм. Тэр жилээ сумынхаа наадамд түрүүлээд, Борнуурын наадамд ес, Залуучуудын наадамд зургаагаар тус тус давхисан. Ер нь соёолонгоосоо хойш л тогтмол  амжилттай наадаж байгаа адуу даа. Соёолонгийнхоо өвөл гурав уралдаж нэг түрүүлж, нэг айрагдаад хавчигтаа сумынхаа наадамд айрагдсан.
-Энэ жил хэдтэй адуу вэ?
-Есөн настай.Сумын ойгоос өмнө хавар нэг уралдаад айрагдсан. Би ер нь хол явж чаддагүй хүн байгаа юм.
-Сумынхаа баяр наадамд хэдэн насны морь мордуулсан бэ?
- Азарга, даага хоёр мордуулсан. Азарга нь айрагдаж, даага нь хорь гаргаж давхисан даа.
-Энэ жилийн наадам өмнөх ойн баяр наадмуудаасаа юугаараа  давуу болсон бэ. 90 жилийн ойн баяр наадмын талаарх сэтгэгдлээсээ хуваалцаач?
-Олон газрын уяачид ирж оролцсон өргөн дэлгэр сайхан наадам болсон. Одоогоос 10 жилийн өмнө 80 жилийн ойгоор би хээр азарганыхаа эцэг хүрэн азаргыг  есөөр, бас нэг шүдлэн үрээ зургаагаар давхиулж байлаа. Энэ жилийн хувьд хээр азарга маань айрагдаж машинаар шагнуулсан.Нас болгонд хамгийн дээгүүр давхисан нутгийн адууны эзнийг машинаар шагнахаар шийдсэн юм билээ. Тэр дагуу миний хээр азарга дөрвөөр давхисан ч Угтаалцайдамынхаа азарганууд дундаасаа түрүүлсэн хэмээн үзэж портер машинаар мялаасан. Морь уясан цагаас хойш чамлахааргүй олон айраг түрүү хүртэж, мотоцикль, зурагт  тэргүүтнээр шагнуулж байсан  ч анх удаа машин авлаа. Сэтгэл өндөр сайхан байна.
-Хээр азарганы эзэн хэдий үеэс хурдан хүлгийн уяа сойлго тааруулж, ямар амжилт үзүүлээд байгаа вэ?
-Би мэдээ орсон цагаасаа мал маллаж байгаа хүн. Миний эцэг морь мал уяж байгаагүй ч хүүхэд байхдаа хурдны морь унаж байсан гэдэг. Харин миний хувьд багадаа морь мал унаж байгаагүй ч залуугаасаа улс дуурайж морь уяж байгаа хүн. Энэ хавьдаа буюу Залуучууд, Атар, Баянцогт, Баянчандмань, Борнуур  зэрэг сумдаар нааддаг. Аймаг, улсын наадамд уралдаж байгаагүй. Морь уясан цагаас гаргасан амжилтыг үндэслэж сумын Алдарт уяач цолыг нэлээд хэдэн жилийн өмнө авсан.
-Баярын сэтгэгдлээсээ хуваалцсан танд баярлалаа. Дараа дараагийн уралдаануудад нь амжилт хүсье.
"Тод магнай" сэтгүүл №59