“Жавхлант шарга”-ын шилдгүүд тодорлоо

Сүхбаатар аймгийн "Жавхлант шарга" МСУХ шинэ жилийн баярын цэнгүүнээ хийж, 2014 оны шилдгүүдээ тодруулжээ. 2014 онд ажил үйлс амжилтаараа бусдыг хошуучилсан
Шилдэг салбар холбоо: Эрдэнэцагаан сумын "Егүзэрийн хүлэг"
Уулбаян сумын "Орлойн хурд" МСУХ
Шилдэг уяач: Эрдэнэцагаан сумын харьяат аймгийн Алдарт уяач Эзэнмөнхийн Мөнх-Эрдэнэ
Халзан сумын харьяат МУ-ын Алдарт уяач Ухнын Эрдэнэбилэг
Халзан сумын харьяат аймгийн Алдарт уяач Баярын  Баттөр нар тодорчээ. Жил бүрийн шилдэг уяачид баярт хүрэлцэн ирсэн зочдын дунд дааганы хонжвортой азын сугалаа явуулдаг уламжлалтай.Тэрхүү уламжлалын дагуу шилдэг уяачид гурван азтанд өөрийн адуун сүргээсээ даага бэлэглэсэн.
Шилдэг азарга:Хурдны өлгий нутгийн шилдэг азаргаар сум, аймгийнхаа баяр наадамд түрүүлж, “Дорнод талын хурд-2014” зүүн бүсийн уралдаанд айрагдсан Наран сумын харьяат сумын Алдарт уяач  С.Эрдэнэчулууны зээрд азарга тодорлоо. Өнгөрсөн жил Хэнтий аймаг үүсч байгуулагдсаны 90 жилийн ой, зүүн бүсийн уралдаанд айрагдаж байсан энэ хурдан хүлгийг морь сонирхогчид эчнээ мэдэх бизээ.
Шилдэг их насны морь: Аймгийнхаа баяр наадамд түрүүлж, “Дорнод талын хурд-2014” зүүн бүсийн уралдаанд айрагдсан Халзан сумын харьяат, аймгийн Алдарт уяач Ж.Мөнхсүрэнгийн хээр.
Шилдэг соёолон: “Дорнод талын хурд-2014”  зүүн бүсийн уралдаанд аман хүзүүдэж, аймгийн баяр наадамд айрагдан Дорнод аймгийн Матад сумын 90 жилийн ойд таваар давхиж, Халхгол сумын 90 жилийн ойд түрүүлсэн Халзан сумын харьяат Ч.Доржцэрэнгийн хүрэн.
Шилдэг хязаалан: “Дорнод талын хурд-2014” зүүн бүсийн уралдаанд айрагдсан Асгат сумын харьяат Х.Буджавын хүрэн.
Шилдэг шүдлэн: Дорнод аймгийн Матад, Халхгол сумдын 90 жилийн ой,  Дорноговь аймгийн Замын-Үд сумын 20 жилийн ойд тус тус айрагдаж, Сүхбаатар аймгийн Эрдэнэцагаан сумын 90 жилийн ойд түрүүлсэн Онгон сумын уяач А.Лувсандоржийн саарал
Шилдэг даага:Аймгийнхаа баяр наадам болон Сүхбаатар сумын 90 жилийн ойд тус тус түрүүлсэн Асгат сумын харьяат аймгийн Алдарт уяач Ж.Баярсайханы хонгор тус тус шалгарчээ.
Шилдэг уралдаанч хүүхдүүд:
Шилдгийн шилдэг-Эрдэнэцагаан сумын харьяат Батжаргалын Ганхүү
Шилдэг уралдаанч:Батхуягийн Энхболд, Батжаргалын Эрхчөлөө, Осгонбаатарын Хүслэнбаяр,Гөлөгийн Өсөхбаяр,Энхбаатарын Ган-Эрдэнэ, Ганхүрэлийн Зинамядаг, Эрдэнэцэцэгийн Батчулуун,Эрдэнэчулууны Цэгмид нар тус тус тодорсон байна. Баяр дээр баяр нэмсэн чихэнд чимэгтэй өөр нэгэн мэдээ бол Эрдэнэцагаан сумын малчин Ганжуурын Бөхчулуун морин жилд 1021 адуу тоолуулсан явдал байлаа. Ийнхүү хурдны өлгий нутгийн хийморилог уяачдын баярын цэнгүүн өргөн дэлгэр сайхан боллоо.
“Жавхлант шарга" МСУХ-ны нарийн бичгийн дарга Ө.Хүдэрхангай