Түмэн эх хонгор

Төрийн наадамд хоёр жил дараалан их морь түрүүлгэсэн гэдгээрээ Дорноговьчууд, тэр дундаа хүлэг морин шүтээнтэй хийморилог эрс нь эрхгүй омогшдог. 2010 онд АХ-ын 89 жилийн ойн баяр наадмын түрүү   Говь-Алтай аймгийн Дэлгэр сумын уугуул, "Мандал Алтай" ХК-ийн захирал  С.Балдандоржийн хонгор морь Дорноговийн адуу.  Бүр тодруулвал, Мандах сумын уугуул Чулууны унаган адуу. Түүний  “Баярмаа” хээр хэмээх хурдан азарганых нь төл халзан гүүний унага юм. Чулуун хонгор морио хүргэн аймгийн Алдарт уяач Д.Хашбатад бэлэглэсэн бөгөөд хязаалангаасаа эхэлж уягдан сумынхаа 80 жилийн ойгоор айргийн дөрөвт хурдалж өм нээгдэж байжээ. Түүний дараа жил соёолондоо сумынхаа баяр наадамд аман хүзүүнд хурдлан, ноён хутагт Данзанравжаагийн мэлмий гийсний 205 жилийн ойд түрүүлж байсан хэмээдэг. Харин 2009 оны хувьд хонгор морь аймгийн хаврын бүсийн уралдаанд түрүүлж, Улсын наадамд 11-ээр давхиад, давхар уяагаар Баянхонгор аймагт болсон Ламын гэгээн Лувсанданзанжанцаны түмэн мэлмий гийсний 370 жилийн ой хангайн бүсийн уралдаанд 12-т хурдалжээ.
 2010 оны уралдаан “Хутагтын хурд”-аар эхэлж, айргийн дөрөвт хурдлаад, “Боржигон 2000”-д аман хүзүүнд давхисан амжилтаар үргэлжилсэн байна. Өөрөөр хэлбэл, хонгор морь хязаалангаасаа эхлэн 17 удаа түрүүлж, айрагдсанаас аймгийн чанартай наадамд хоёр түрүүлж, хоёр айрагдаад байхдаа одоогийн эзэн “Мандал Алтай” группын Ерөнхийлөгч Сүхийн Балдандоржид иржээ.
Уясан эзний урмыг сэргээн хурдалдаг хонгор морь ирсэн жилээ буюу 2010 онд АХ-ын 89 жилийн ой Үндэсний их баяр наадамд түрүүлж, давхар уяагаар Говь-Алтай аймгийн 70 жилийн ой баруун бүсийн даншиг наадамд түрүүлэн Тайж адууны чансааг батлан харуулсан юм. Өнөө жил төрийнхөө наадамд зургаад хурдалсан энэ хурдан хүлэг шигшмэл морьдын “Их хурд-6” уралдаанд наймд давхисан билээ. 

"Тод магнай" сэтгүүл Дорноговь аймгийн тусгай дугаар